DILI, 05 Janeiru 2026 (TATOLI)—Governu liuhusi Ministru Obra Públika, Samuel Marcál, informa daudaun ne’e sira kontinua taka fila-fali dalan husi Dolok Oan ba Hera, hafoin loke provizóriu ba públiku hodi halo movimentasaun iha selebrasaun festa Natál (25 Dezembru 2025) no Tinan Foun (01 Janieru 2026).
“Dalan iha Dolok Oan ba Hera ne’e ita kontinua taka fali ona ba movimentu transporte iha orsida lorokraik. Ne’ebé, foin dadauk ne’e ita loke provizóriu de’it, hein prosesu reabilitasaun ne’e konklui ona foin loke ba públiku hodi asesu halo movimentu ba-mai,” Ministru Obra Públika, Samuel Marçal, informa ba Agência Tatoli iha nia kna’ar fatin, Kaikoli, ohin.
Governante ne’e afirma, taka dalan ne’e ba movimentu transporte de’it tanba atu asegura impedimentu ba prosesu servisu nian, tanba empreza tenke finaliza iha fulan haat mai tan, enkuantu ba la’o-ain sira kontinua asesu hanesan baibain.
Prezidente Autoridade Munisípiu Dili, Francisco da Costa, hateten iha selebrasaun loron Natál, nia ho ekipa hala’o servisu antisipadamente ba estrada públiku sira-ne’ebé kada tinan sempre akontese foer naklekar arbiru, nune’ e sira halo operasaun hahú husi Tasi-Tolu to’o Dolok Oan.
“Maneira ne’ebé ami halo mak koloka lixeiru sira iha fatin ne’ebé konsentra komunidade (rame) hodi antisipa komunidade so’e foer arbiru,” nia dehan.
Nia informa, iha loron ne’ebé sira halo operasaun ba rekollamentu foer sira iha espasu públiku kuaze iha kamioneta ualu (8), nune’e hahú husi loron 01 fulan-Janeiru ba oin, Autoridade Munisípiu Dili ho ekipa sei rekolla lixu hahú husi tuku 18h00 lokraik to’o 07h00 dadeer no oras ba komunidade satu so’e lixu hahú husi 18h00 lokraik to’o 06h00 dadeersan.
“Husu ba komunidade atu kumpre regulamentu ida-ne’e atu sidade Dili bele moos no furak, enkuantu karik komunidade kontra regra sei aplika sansaun sosiál ka konsidera hanesan ema ne’ebé la’ós moris iha sidade,” nia dehan.
Entretantu prosesu reabilitasaun estrada Dolok Oan ba Hera daudaun ne’e atinje ona 70%, tamba seidauk monta iluminasaun iga dalan sira-ne’e, pinta estrada, trotoar balun seidauk hotu inklui nahe lakatraun faze daruak kuaze kilómetru 1,2.
Notísia Relevante: Governu husu vizitante mantein ambiente saudável iha Kristu Rei-Dolok oan
Jornalista : Alexandra da Costa
Editór : Cancio Ximenes
