PAM Baukau husu autoridade suku implementa PNDS tuir prioridade
BAUKAU, 05 Janeiru 2026 (TATOLI)—Prezidente Autoridade Munisipál (PAM) Baukau, Veneranda Eurico Lemos Martins husu ba Autoridade suku iha munisípiu Baukau atu implementa atividade Programa Nasionál Dezenvolvimentu Suku (PNDS) ba tinan-ne’e tuir prioridade.
Veneranda konsidera liuhusi PNDS sei hakbesik dezenvolvimentu ba povu iha tinan 2026 bazeia ba alokasaun orsamentu ba suku sira-ne’ebé iha kapasidade jere projetu PNDS ho di’ak, sei hetan atividade rua to’o tolu tuir planu prioridade ne’ebé aprova iha konsellu suku tuir matadalan PNDS.
“Ha’u husu xefe suku sira konsentra ho didi’ak atu haree saida mak prioridade,” Veneranda Lemos hateten liuhosi komunikadu ne’ebé TATOLI asesu, Segunda ne’e.
Eis deputada iha Parlamentu Nasionál ne’e rekomenda ba xefe suku sira atu kontinua koordena malu nune’e bele liga atividade PNDS ba malu hanesan konetividade estrada entre suku viziñu para povu bele sente dezenvolvimentu mezmu neineik maibé beibeik.
Nia relata objetivu implementasaun PNDS atu fó benefísiu ba povu no husu suku ne’ebé seidauk finaliza implementa projetu PNDS tinan 2025 nian presiza koordena ho responsavel PNDS munisípiu hodi buka solusaun.
“Dezenvolvimentu lori besik ba povu mak liuhusi programa PNDS. La aproveita ho didi’ak pasiénsia. Ba Suku ne’ebé ativu bele fó rua ka tolu depende ba nia kapasidade,” Veneranda akresenta.
Entretantu, Munisípiu Baukau iha tinan 2026 aloka orsamentu millaun $2 ne’ebé sei utiliza iha tótal suku 62 no sei hein planu prioridade husi suku.
Jornalista: Natalino Belo
Editór: Xisto Freitas da Piedade
