KOVALIMA, 05 Janeiru 2026 (TATOLI) – Prezidente Autoridade Munisípiu (PAM) Kovalima, Miguel Armada Cardoso, segunda-ne’e, liuhusi reuniaun ho dirijente eskola sira hodi deside katak orsamentu implementasaun programa merenda eskolár sei jere husi eskola sira, nune’e fasil atu halo kontrolu.
“Ha’u ho estrutura foti desizaun hodi entrega kompetensia ba eskola sira maka jere orsamentu ba implementasaun programa merenda eskolár (PME) , nune’e autoridade fasil atu kontrola. Tanba ekipa Jestaun Programa (EJP) maka jere difisil atu halo kontrolu”, PAM Kovalima hateten hafoin enkontru, iha salaun AMC, ohin.
Hafoin deside, PAM husu responsavel eskola sira tenke ezekuta tuir baze legál ho Lei-númeru 3/2025 iha artigu 7, nune’e implementa tuir prosesu aprovizionamentu no tenke fó ai-han ne’ebé ho nutrisaun ba labarik sira.
Aleinde ne’e, Autoridade Kovalima sei forma grypu ne’ebé envolve husi Servisu Munisipál Planeamentu, Servisu Munsipál Seguransa Alimentár, Servisu Munisipál Agrikultura no Servisu Munisipál Saúde atu haree implementasaun PME.
Iha biban hanesan, Diretora Servisu Munisipál Edukasaun Kovalima, Elda de Fátima, dehan implementasaun programa Merenda eskolár importante, nune’e ema hamutuk atu kontrola tanba implementa PME ho di’ak depende husi eskola rasik.
Dirijente Edukasaun ne’e dehan, orsamentu PME 2026 Servisu Munisipál seidauk bele fó sai, tanba nia orsamentu seidauk klaru.
Jornalista: Celestina Teles
Editór: Florencio Miranda Ximenes
