VIKEKE, 06 Janeiru 2026 (TATOLI)—Xefe Aldeia Uma-Boot, Suku Luka, Postu Vikeke Vila, Munisípiu Vikeke, Mariano Mendonça solisita Governu liuhusi Ministériu Obra Públika (MOP) atu orienta empreza responsavel hodi konstrui ponte Uelolo, Postu Vikeke Vila, Munisípiu Vikeke.
“Ponte Uelolo ne’e Governu halo ona lansamentu fatuk inan dahuluk iha Outubru 2025, maibé ami haree obra konstrusaun ponte Uelolo ne’e seidauk hahú. Tanba ne’e, ami hakarak husu MOP hodi orienta empreza responsavel hodi implementa servisu para aselera lalais ponte ne’e,” Mariano Memdonça ba TATOLI iha Postu Vikeke Vila, Tersa ne’e.
Notísia relevante: https://tatoli.tl/2025/10/04/pm-xanana-lansa-fatuk-inan-ba-ponte-uelolo-vikeke/
Xefe Aldeia ne’e haktuir hafoin lansamentu obra ne’e, empreza responsavel instala ona armazein no deztaka ona ekipamentu pezadu sira, maibé servisu seidauk implementa.
“Durasaun servisu ne’e tinan ida, maibé agora empreza dada-dada seidauk implementa. Ami rekomenda ba parte kompetente tenke fó-atensaun, tanba ponte Uelolo ne’e difikulta tebes ami-nia populasaun no fó risku ba populasaun nia vida iha tempu udan,” nia akresenta.
Mariano informa, daudaun ne’e komunidade halo viajen ba munisípiu la’o husi mota laran, maibé kuandu udan boot mota tun sira la bele halo movimentu.
Hatán ba preokupasaun ne’e, Diretór Servisu Obra Públika Munisípiu Vikeke, Casildo Gomes hateten, kona-ba konstrusaun ponte Uelolo ne’e, empreza daudaun ne’e komesa halo morru protesaun.
“Maibé ba konstrusaun ne’e ha’u sei hein enjiñeiru nasionál sira-ne’ebé tama konta ba ponte Uelolo hatama relatóriu mak ha’u fó-sai ba públiku,” nia haktuir.
Entretantu, projetu ponte Uelolo ne’e ho númeru kontratu SSS/118/MOP-2025, superviziona husi Ministériu Obra Públika (MOP), sei gasta orsamentu totál hamutuk $4.398.863,24, responsabiliza husi empreza Nananiu Engineering & Construction Company Unipessoal, Lda, ho durasaun servisu loron 365.
Tuir dadus, populasaun Luka ne‘ebé hela pertense ba área Uelolo ho totál hamutuk 2.455.
Jornalista: Vitorino Lopes da Costa
Editór: Xisto Freitas da Piedade
