DILI, 06 Janeiru 2026 (TATOLI)–Komandu Polísia Nasionál Timor-Leste (PNTL) bolu ona Xefe Suku Kaikoli, Hipólito Marques Sarmento hodi halo aprosimasaun ho membru uma-kain haat ne’ebé okupa rai ne’ebé sei halo konstrusaun edifísiu Kuartél Jerál PNTL iha Kaikoli.
“Iha oin ne’e komunidade hela, entaun Komandu ko’alia hamutuk ho Xefe Suku no Advogadu husi komunidade afetadu sira atu nune’e buka solusaun ba kestaun ne’e. Solusaun mak bele muda sai komunidade ne’ebé hela iha oin ne’e atu nune’e kompañia bele mobiliza sasán tama sai hodi kontinua konstrusaun edifísiu kuartél Jerál PNTL,” Komandante Jerál PNTL, Komisáriu Jerál Polísia Henrique da Costa hato’o ba Jornalista sira iha nia knaar fatin, Komandu Jerál PNTL, KaiKoli, Tersa ne’e.
Hafoin de ne’e, Xefe Suku sei komunika filafali ho uma-kain afetadu ne’ebé to’o agora seidauk iha solusaun.
“Depois mak sira filafali mai aprezenta ba Komandu Jerál PNTL depois mak kontinua ba Ministériu Justisa,” nia akresenta.
Komandu husu ba Xefe Suku Kaikoli, Advogadu no komunidade afetadu sira, katak PNTL sira presiza fatin ne’e atu halo konstrusaun edifísiu inklui entrada tama.
“Ita husu ba komunidade afetadu sira atu nune’e apoiu PNTL no apoiu mós Governu tanba ita presiza duni fatin ne’ebá,” nia hato’o.
Notísia relevante : Edifísiu tuan Tribunál Dili instala ba Sekretaria Komisaun Rekrutamentu Juíz
Iha parte seluk, Autoridade lokál no Advogadu prontu koopera ho PNTL no Governu.
Aleinde ne’e, PNTL sei halo komunikasaun ho Terra no Propriedade husi Ministériu Justisa hodi bele deside.
Iha fatin hanesan, Xefe Suku Kaikoli, Hipólito Marques Sarmento, haktuir, enkontru ne’e hodi parte PNTL bele halo negosiasaun entre Xefe Suku Kaikoli no Advogadu.
“Ohin mai ne’e Xefe Suku mesak ho Advogadu mai atu rona rezultadu kona-ba rai ne’e, iha buat rua mak ohin ami rona katak komunidade hakarak rai ne’e, hakarak osan, osan mós iha. Ami ohin ko’alia ho Komandante Jerál atu nune’e Advogadu ho ha’u sei fila ba rona took komunidade nia hakarak ne’e saida, hakarak osan ka rai, se hakarak rai troka rai ka osan troka rai,” nia katak.
Autoridade Suku ne’e dehan, karik komunidade afetadu hakarak rai maka Estadu prepara ona eai iha fatintolu hanesan Tibar, Hera no Metinaru.
“Depois ida-ne’e mak komunidade afetadu la simu, ita sei ko’alia ho osan, tanba osan ne’e mak ita seidauk hatene kada metru ne’e osan hira? Ida-ne’e mak ami dúvidas ne’e, só rai-na’in mak hatene,” nia hato’o.
Okupante ba rai ne’e lori ona kazu rai ne’e bá Tribunál no ikus mai rai-na’in mak manán, maibé to’o agora parte PNTL seidauk hatama rekursu.
“Agora ita hasoru Estadu, tanba ne’e ami tenke tetu didi’ak bainhira foti desizaun,” nia tenik.
Jornalista : Natalino Costa
Editora : Julia Chatarina
