KOVALIMA, 06 Janeiru 2026 (TATOLI) – Ministru Petróleu no Rekursu Minerál (MPRM), Francisco da Costa Monteiro, tersa-ne’e , akompaña husi reprezentante Prezidente Autoridade Kovalima, Filomeno Cardoso, entrega sertifikadu ba formandu lian inglés iha aldeia Sanfuk, Suku Camnasa, Postu Administrativu Suai, Munisípiu Kovalima.
Formandu ne’ebé maka simu sertifikadu dalen inglés hamutuk na’in-70, formandu sira ne’e tuir formasaun lian inglés durante fulan-neen ne’ebé hanorin husi formadór sira husi Sentru Formasaun SOLS AHHA, iha sentu formasaun lian inglés ne’ebé lokaliza iha Aldeia Sanfuk.
“Formasaun lian inglés ne’e, ita hala’o tanba atu hahú denzenvolvimentu indústria petróleu iha Suai, entaun importante atu joven sira iha abilidade atu kompete iha merkadu traballu. Ho formasaun ne’e, uluk ita nia joven balun bá ona servisu iha rai li’ur no balun iha ne’e”, Ministru Francisco Monteiro hato’o liuhusi nia diskursu iha Aldeia Sanfuk-Kovalima, ohin.
Governante ne’e promete sei hakarak kontinua intensifika liután formasaun lian inglés iha Munisípiu Kovalima atu formandu sira ne’ebé maka finaliza ona formasaun lian inglés nivel I hanesan pasu importante labele para, maibé kontinua.
“Formasaun lina inglés kontinua, nune’e bele aumenta númeru ho trajetu katak to’o iha 2028 bele prodús formandu na’in-500 tanba projetu boot iha Kovalima presiza joven barak bele halo komunikasaun ho lian inglés”, nia promete.
Iha fatin hanesan, Reprezentante Prezidente Autoridade Munisípiu Kovalima, Filomeno Cardoso, agradese ba MPRM ne’ebé maka kria kondisaun ba joven sira liuhusi loke sentru formasaun lian inglés.
“Ita Kovalima-oan presiza agradese no tenke mai partisipa kursu lian inglés ida-ne’e hodi hasa’e abilidade kada joven nian hodi kompete iha postu traballu,” nia enkoraja.
Entretantu, Diretór SOLS AHHAA Education Nasionál, Mateus Carlos Sarmento, promete sei aumenta ekipa, nune’e kontinua fasilita formasaun ba lian inglés no mós presiza fasilita formasaun disiplina matematika no programa sira seluk tan.
“Ami nia programa lubuk ida, ami nia prezensa iha fatin ida-ne’e atu sai formadór ida di’ak hodi prepara ita nia joven sira hodi bele kompete kampu traballu. Ami promete forma sira ho kualidade”, nia promete.
Jornalista: Celestina Teles
Editór: Florencio Miranda Ximenes
