BOBONARU, 06 Janeiru 2026 (TATOLI) – Natar-na’in sira hamutuk ho líder komunitáriu suku Ritabou, postu administrativu Maliana, hasoru malu ho Prezidente Autoridade Munisípiu (PAM) Bobonaru, Paulo Moniz Maia, hodi buka solusaun ba problema projetu irrigasaun Genumatan, ne’ebé empreza Bia Basan Mogen Unipessoal Lda seidauk finaliza.
Xefe Suku Ritabou, Maximiano dos Santos Araújo, reprezenta natar-na’in sira hato’o lamentasaun, tanba daudaun ne’e projetu paradu no seidauk bele fornese bee ba natar pur volta ektare 80, maski agora tama ona etapa preparasaun atu halai natar époka dahuluk tinan 2025-2026.
Notísia relevante: Traballadór halo asaun protestu hodi ezije direitu ba empreza Bia-Basan Mogen
“Klaru katak irrigasaun ida-ne’e labele finaliza iha tempu badak, tanba estrada ba karreta atu tula materiál tama bá ne’e ema rai-na’in fila-rai ona, tanba sira ne’e depende de’it ba udan-been. Ne’e mak irrigasaun ne’e labele hotu, se la hotu tinan ne’e, ami labele halo natar. Ami-nia pergunta mak se ami la halo natar tinan ne’e sé mak atu fó han ami? Kompañia ga Governu?”, nia ketiona durante enkontru ne’ebé realiza iha salaun VIP Autoridade Munisípiu Bobonaru.
Natar-na’in Daniel Talo Mali observa katak provizoriamente bee labele halai tama ba kanu-laran tanba falla iha konstrusaun Intek I.
Ba kestaun ne’e, Prezidente Autoridade Munisípiu Bobonaru, Paulo Moniz Maia, rekoñese problema ne’e sériu no husu empreza atu responsabliza, liuliu buka meiu atu fornese bee ba natar sira.
“Intek ida bocor ne’e urjentemente imi tenke buka meiu hadi’a, se la’e osan mós la selu, imi mós la hetan ona projetu. Ha’u fó hanoin de’it, la’ós ameasa tanba se projetu ne’e la hotu afeta ba povu nia moris. Ami mós laiha kbiit atu fó han komunidade barak ida hanesan ne’e, entaun ita mesak Bobonaru-oan de’it, imi buka malu ba para tinan ida-ne’e sira kontinua halo natar”, nia afirma.
Sekretáriu Autoridade Munisípiu Bobonaru ba Asuntu Planeamentu no Dezenvolvimentu Integradu, Semedo Lacu Costa, dehan atu bee bele tama ba natar maka agrikultór sira tenke serbisu hamutuk ho empreza.
“Tinan-tinan imi hatama bee ho manuál de’it mós bele, agora irrigasaun hotu ona, hela de’it Intek mak ladún di’ak, imi haruka kompañia ajuda imi lalin fatuk ho rai-henek taka tiha ku’ak ida bocor ne’e para bee bele tama”, Semedo Lacu sujere.
Jerente empreza Bia Basan Mogen Unip. Lda., Onivio Gonçalves, rekoñese katak privizoriamente bee labele tama ba natar laran, tanba konstrusaun Intek I iha problema no susar atu rezolve ho razaun karreta labele mobiliza materiál bá lokál projetu.
Onivio promete empreza nafatin hola responsablidade atu rezolve kestaun ne’e iha tempu badak.
Rezultadu enkontru kuaze oras ida ne’e hatudu katak parte natar-na’in no empreza konkorda malu katak hahú ohin serbisu hamutuk atu garante hatama bee ba natar.
Obra ne’e konstrui ho orsamentu PDIM tinan 2025 ho valór kontratu $229.429,35 hahú iha fulan-Abríl no remata iha Setembru 2025.
Notísia relevante: AMB ameasa atu hapara kontratu empreza konstrutora irrigasaun Genumatan
Jornalista: Sergio da Cruz
Editora: Maria Auxiliadora
