DILI, 06 Janeiru 2026 (TATOLI)—Governu Timor-Leste hato’o nia preokupasaun kona-ba situasaun iha Venezuela ne’ébé fó perturbasaun ba vida sivíl no bele fó impaktu umanitáriu tanba atividade militár estranjeiru sira.
Bazeia ba komunikadu ne’ebé Agência Tatoli asesu iha portál Governu katak, Timor-Leste akompaña ona relatóriu sira kona-ba intervensaun Estadu Unidu Amérika nian iha Repúblika Bolivariana Venezuela, no detensaun no mós hasai ho forsa Prezidente Venezuela, Nicolás Maduro ho nia espoza ne’ebé akontese iha 03 fulan-Janeiru tinan 2026.
Nune’e, Timor-Leste reafirma ninia kompromisu ba direitu internasionál, inklui respeitu ba soberania, atu labele uza ameasa ka uza forsa hasoru integridade territoriál ka independénsia polítika hUsi kualkér Estadu, nomós rezolusaun pasífika ba disputa sira-ne’ebé konsagra ona iha Artigu 2.º iha Karta Nasaun Unida nian, ne’ebé nia prinsípiu esensiál sira atu salvaguarda independénsia País hotu-hotu nian liuliu País ki’ik sira.
Tamba ne’e, Timor-Leste husu hotu-hotu atu mantein kalma, atu fila-fali ba diálogu no diplomasia, nomós rezolusaun pasífika ida ba situasaun, tuir lei internasionál no prinsípiu sira Karta Nasaun Unida nian.
TATOLI
