VIKEKE, 07 Janeiru 2026 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernande informa PNTL liuhusi Unidade Tránzitu Munisípiu Vikeke husi Janeiru to’o Dezembru 2025 rekolla taxa rodoviária hamutuk $22.125.00 ba kofre Estadu.
“Iha tinan 2025 ita rekolla taxa husi rodoviária hamutuk $22.125.00 hodi kontribui ba kofre Estadu. Taxa hirak-ne’e ita rekolla maihusi pasa-revista dokumentu transporte, karta kondusaun no asidente tráfegu sira-ne’ebé akontese iha Munisípiu Vikeke,” António ba TATOLI iha ninia kna’ar fatin, Vikeke, Kuarta ne’e.
Taxa rodoviária ne’ebé Unidade Tránzitu rekolla kada fulan hahú husi Janeiru hamutuk $1.404,00, fulan Fevereiru $1.082,00, fulan Marsu $3.365,00, Abríl $1.217,00, Maiu $386,00, Juñu $1.649,00, Jullu $2.277, Agustu $1.193, Setembru $2.055, Outubru $2.748,00, Novembru $1.514,00 no fulan Dezembru $3.235,00.
Tuir nia katak infratór sira-ne’ebé selu taxa ba Estadu ne’e sai hanesan edukasaun ida ba sidadaun uza transporte hodi halo prevensaun ba asidente tráfegu sira-ne’ebé ema la espera akontese.
“Unidade Tránzitu halo pasa-revista iha dalan sira-ne’e la’ós atu buka osan, maibé ita-nia objetivu ne’e oinsá bele asegura ema no kumpri Dekretu-Lei Nú: 6/2003 kona-ba Kódigu Estrada nian,” nia hato’o.
Nia hatutan Komandu PNTL Munisípiu Vikeke iha 2026 ne’e sei hasa’e vizibilidade iha públiku nune’e komesa semana oin membru PNTL sira iha kapitál Vikeke halo kontrolu tráfegu sira no membru PNTL balun sei kolokadu iha arreadór sira-ne’ebé sempre mosu problema.
“Iha tinan 2025 ne’e ita rejista kazu asidente tráfegu ne’e hamutuk 20, maibé kazu tráfegu ne’e ita la rejista ema mate no kazu sira-ne’e rezolve tuir família,” António relata.
Tuir dadus, kazu asidente tráfegu hahú husi fulan-Janeiru to’o Dezembru 2025 PNTL Vikeke rejista hamutuk 20. Tipu kazu hanesan motorizada ho motorize soke malu hamutuk hitu (7), motorizada monu mesak tolu (3), motorizada soke ema la’o ain tolu (3), karreta soke motorizada rua (2), karreta soke ema rua (2) no motorizeda soke karreta rua (2).
Jornalista: Vitorino Lopes da Costa
Editór: Xisto Freitas da Piedade
