DILI, 07 Janeiru 2026 (TATOLI) – Arsebispu Arkidioseze Metropolitana Dili no Prezidente Konferénsia Episkopál Timorense (CET), Don Virgílio Kardeál do Carmo da Silva, partisipa entre loron 07 no 08 Janeiru 2026, Primeiru Konsistóriu Estraordináriu Kardeál sira-nian ho Papa Leão XIV, ne’ebé hala’o iha Roma.
Tuir dokumentu ne’ebé Tatoli asesu husi pájina Arkidioseze Metropolitana Dili, Don Virgílio arranka bá Roma iha segunda, 05 Janeiru 2026, hodi partisipa iha eventu importante Igreja Katólika ida-ne’e. Iha viajen referida hetan akompañamentu husi Padre Guilhermino da Silva, Vigáriu Episkopál ba Asuntu Edukativu husi Arkidioseze Dili no Pároku Motaél nian.
Tuir ajenda, hafoin partisipa Konsistóriu Estraordináriu ne’e, Kardeál ho nia komitiva kontinua sira-nia viajen bá Portugál iha loron 11 fulan-Janeiru.
Vizita ne’e ho objetivu atu ko’alia kona-ba prosesu transferénsia restu mortál bispu timoroan sira ne’ebé agora daudaun hakoi iha Portugál hodi muda mai Timor-Leste.
Primeiru Konsistóriu Estraordináriu Kardeál sira-nian ho Papa Leão XIV ne’ebé hala’o durante loron rua ne’e nu’udar dahuluk ba Papa hafoin nia pontifikadu.
Tuir Vatican News, konsistóriu sei aborda tema oioin, inklui Evangelii Gaudium no karáter misionáriu igreja nian, konstituisaun apostólika Praedicate Evangelium, papél Kúria Romana nian no ninia relasaun ho Igreja partikulár sira, sinodalidade, no liturjia.
Iha loron rua ne’e nia laran, Amu-Papa Leão XIV sei hasoru malu ho membru Kardeál sira, barak husi sira ne’e, antes ne’e partisipa iha serimónia taka Odamatan Santa no Misa Epifania nian iha loron 06 Janeiru 2026.
Enkontru ne’e ho objetivu atu haburas kompriensaun mútua no fó apoiu no konsellu ba Santu Padre hodi hala’o ninia responsabilidade ba governasaun Kreda universál.
Konsistóriu sei loke iha loron-kuarta loraik, 07 Janeiru 2026, tuku 4h00 oras lokál iha Salaun Sínodu Vatikanu nian ne’ebé prosesu tomak sei hala’o ho odamatan taka.
Nune’e, iha kinta dadeer, 08 Janeiru 2026, Papa Leão XIV sei prezide Santa Misa ho Kardeál sira ne’ebé prezente iha Altár Kadeira nian iha Bazílika Saun Pedro nian iha tuku 7h30 dadeer.
Hafoin misa sesaun dadeer, konsistóriu nian sei hala’o husi tuku 9h30 dadeer to’o tuku 12h45 iha Salaun Sínodu. Hafoin ne’e, enkontru sei hahú fali ho sesaun loraik nian husi tuku 15h15 to’o tuku 19h00, hodi konklui Konsistóriu Estraordináriu Dahuluk Kardeál sira-nian ho Papa Leão XIV.
Notísia relevante: Loron Mundiál ba Pás: Don Virgílio konvida komunidade sai uma pás nian
Jornalista: Arminda Fonseca
Editora: Maria Auxiliadora
