DILI, 07 Janeiru 2026 (TATOLI)—Diretór Ensinu Sekundáriu Jerál 10 Dezembru Komoro, Manuel Verdial hateten Eskola Sekundáriu Jerál (ESJ) 10 Dezembru simu de’it estudante sira-ne’ebé termina ensinu báziku iha Postu Administrativu Dom Aleixo, Munisípiu Dili.
“Ami prioriza uluk estudante sira-ne’ebé ramata husi ensinu báziku (9.o do 3.o Ciclo do Ensino Básico) iha Postu Administrativu Dom Aleixo nian hanesan ensinu báziku husi Fatuhada, Manleuana, Hudi-Laran, Bebonuk inklui EBC 10 Dezembru rasik,” Manuel Verdial dehan ba TATOLI iha resintu Ministériu Edukasaun, Vila-Verde, Kuarta ne’e.
Nune’e, iha tinan 2026, ESJ 10 Dezembru simu de’it estudante foun ba tinan letivu 2026 hamutuk na’in-540, tuir saladeaula ne’ebé iha.
“Ita iha vagatura tuir saladeaula. Ita iha saladeaula hamutuk 32. Hosi ne’e ita koloka ba 10.⁰ ano, 11.⁰ ano no 12.⁰. Agora ba 10.⁰ ano ita iha saladeaula 12, nune’e presiza estudante foun 540, no kada turma sei akumula estudante na’in-45,” nia esplika.
Entretantu, profesór ne’ebé hanorin iha ESJ 10 Dezembru hamutuk 64.
ESJ 10 Dezembru utiliza osan konsesaun eskolár
Iha parte seluk, Diretór Ensinu Sekundáriu Jerál 10 Dezembru hatutan nia parte uza osan husi konsesaun eskolár hodi selu seguransa ne’ebé eskola rekrutadu hodi tau-matan ba eskola.
“Ida-ne’e ita halo ona konsulta ho Edukasaun Munisipál no mós Adjuntu Inspetór Jerál Ministériu Edukasaun nian. Ami konkorda katak bele ko’a osan konsesaun eskolár atu ita bele selu seguransa,” Manuel realsa.
Nia subliña, eskola rekruta duni pesoál seguransa ida, nune’e bele asegura situasaun ho di’ak iha eskola.
“Tuir loloos ami fó $115, maibe dalaruma nia servisu liu tiha ida-ne’e entaun ami fó ba nia kada fulan $120,” nia katak.
Jornalista: Osória Marques
Editór: Xisto Freitas da Piedade
