DILI, 07 Janeiru 2026 (TATOLI)—Governu liuhusi reuniaun Konsellu Ministru halo analiza ba proposta prosesu sertifikasaun Aeroportu Internasionál Rota do Sândalo iha Oekusi no Aeroportu Internasionál Comandante-em-Chefe das FALINTIL, Kay Rala Xanana Gusmão iha Suai, ne’ebé aprezenta husi Ministru Transporte no Komunikasaun, Miguel Marques Gonçalves Manetelu.
Prosesu sertifikasaun ida-ne’e ho objetivu atu hametin seguransa no efisiénsia operasaun tráfegu aéreu nian iha infraestrutura aeroportuáriu sira-ne’e, hodi garante kondisaun adekuada ba operasaun regulár vou pasajeiru nian sira, tuir padraun internasionál hosi Organizasaun Aviasaun Sivíl Internasionál no regulamentu nasionál aplikavel.
Ministru Transporte Komunikasaun, Miguel Gonçalves Manetelu, hateten ohin iha aprezentasaun proposta rua hanesan prosesu sertifikasaun aeroportu Suai ho Oekusi, maske iha Suai ladun iha problema ba vou enkuantu iha Oekusi mak iha problema vou ligadu ho espasu aero.
“Hanesan ha’u ko’alia beibeik katak bainhira aviaun semo ka uitoan tama ona ba Indonézia nia espasu aero, tanba ne’e mak ha’u bolu AACTL sira mak sei sprova no sertifika aeroportu hirak ne’e, maibé polítikamente sira hakarak hetan forsa polítika antes aprova,” Ministru Manetelu informa ba jornalista sira iha Palásiu Governu, ohin.
Nia hatutan, ohin nia mai halo aprezentasaun iha reuniaun Konsellu Ministru atu halo apreiasaun no aprova prosesu sertifikasaun ne’e, no ba oin AACTL tenke aprova ona prosesu sertifikasaun ida-ne’e.
“Aeroportu iha Suai ne’e atu reforsa dezenvolvimentu iha tasi-mane, entaun aviaun lójistika ki’ik sira sei bele halo operasaun iha ne’ebá la’ós aviaun komersiál,” nia esplika.
Jornalista : Alexandra da Costa
Editór : Cancio Ximenes
