VIKEKE, 07 Janeiru 2026 (TATOLI)—Diretór Servisu Obra Públika Munisípiu Vikeke, Casildo Gomes informa ekipa husi Ministériu Obra Públika (MOP) nasionál hamutuk ho Obra Públika Munisípiu Vikeke hahú lori empreza sira bá halo vizita direta pakote estrada rurál hitu ne’ebé tama ba reabilitasaun iha tinan 2026.
“Iha tinan ida-ne’e ita hetan projetu reabilitasaun estrada rurál hamutuk pakote hitu. Hahú segunda ne’e parte MOP lori direta ita-nia empreza lokál sira bá haree terrenu sira iha Postu Ossú no Postu Uatulari, molok empreza sira sosa dokumentu konkursu ba reabilita estrada,” Casildo Gomes ba TATOLI iha Postu Vikeke Vila, Kuarta ne’e.
Nia dehan, objetivu husi site visit ne’e atu empreza sira haree direta uluk kada pakote hitu, depoiz sira interese mak sosa dokumentu.
Entre pakote hitu ne’e, pakote rua iha Postu Ossú no pakote lima iha Postu Uatulari. Husi pakote hitu ne’e, estimasaun sei gasta orsamentu hamutuk Millaun $5.
Estrada sira-ne’ebe tama reabilitasaun mak hanesan Postu Ossú iha Suku Nahareka hahú husi Depalasi bá Uabobu Sta 18+700-21+950. Iha Postu Uatulari kompostu husi Kaikasabu- Haulale Sta 0+000-4+580 iha Suku Afaloikai, Haulale – Nunumalau Sta 4+585 -9+385, husi Aldeia Iraler – Darlari Sta 5+500-9+000. Pakote husi Uatakaelale Suku Vessoru Sta 0+000-5+150 no Suku Vessoru liga bá Suku Babulu Sta 4+150-8+300 no Bebui bá Uatakaelale Sta 2+200-4+5000.
Iha fatin ketak, Xefe Suku Afaloikai, Postu Uatulari, Cesário N. Pires haktuir ekipa MOP no empreza sira halo ona vizita bá estrada sira-ne’ebé tama ba reabilitasaun iha área Suku Afaloikai no konsidera katak bainhira obra ne’e implementa ajuda ona populasaun tanba durante ne’e estrada difikulta populasaun nia movimentu.
Jornalista: Vitorino Lopes da Costa
Editór: Xisto Freitas da Piedade
