MOP relata progresu dezenvolvimentu infraestrutura iha territóriu ba PM Xanana
DILI, 07 Janeiru 2026 (TATOLI)—Ministru Obra Públika, Samuel Marçal, liuhusi reuniaun Konsellu Ministru, hato’o relatóriu progresu servisu prinsipál sira-ne’ebé alkansa ona iha dezenvolvimentu infraetrutura ne’ebé kobre territóriu laran tomak ba Primeiru-Ministru, Xanana Gusmão.
“Iha relatóriu ne’e hatudu katak atinjimentu 95% liuhusi ninia ezekusaun 93% inklui seluk tan, relatõriu ho objetivu atu ministru seluk mós bele akompania prosesu no progresu infraestrutura iha nasionál, munisipál no rural,” Ministru Obra Públika, Samuel Marçal, informa ba jornalista iha Palásiu Governu, ohin.
Kona-ba progresu dezenvolvimentu iha ámbitu estrada rurál, husi projetu 260 ne’ebé prevee ona, projetu 45 mak konklui ona no 215 marka ona ba tinan 2026.
Kona-ba estrada urbana, nasionál no munisipál, finaliza ona projetu 27 no projetu 60 seluk neʼebé prevee ona atu implementa iha tinan 2026.
Entretantu, kona-ba ponte husi projetu 17 neʼebé planeia ona ne’e, projetu ida (1) ramata iha 2025 no projetu 12 mak ajenda ona ba ezekusaun iha 2026.
Iha área bee no saneamentu nian, nia informa, iha projetu ida (1) mak remata ona no projetu 12 mak prosesu la’o hela no hein atu ramata iha 2026.
Iha setór eletrisidade nian ne’e, iha projetu 15 mak finalzia ona husi projetu 49 ne’ebé prevee ona ba tinan 2026, inklui mós kona-ba projetu emerjénsia hamutuk 39 mak ramata iha 2025 no projetu 228 ne’ebé mak programa ona atu ramata iha 2026.
Iha área edifísiu públiku no jardín sira, iha projetu lima (5) mak implementa ona no iha projetu 21 seluk ne’ebé mak planeia ona atu ezekuta iha tinan 2026.
Jornalista : Alexandra da Costa
Editór : Cancio Ximenes
