DILI, 07 Janeiru 2026 (TATOLI)—Servisu Migrasaun arrekada reseita hamutuk $2.480.820 ba kofre Estadu durante tinan 2025 nia laran.
“Reseita ne’e mai husi emisaun vistu, estensaun vistu no emisaun estensaun, autorizasaun rezidénsia no aplikasaun koima,” Diretora Servisu Migrasaun Superintendente Asisténte Polísia Adelaide da Rosa, informa iha ninia knaar fatin, Vila-Verde, Kuarta ne’e.
Reseita iha tinan 2025 sa’e kompara ho tinan 2024 ne’ebé rekolla millaun $2.
Tanba ne’e, Servisu Migrasaun iha planu ba futuru atu hadi’a koneksaun entre sistema atendimentu no operasaun iha postu fronteira inklui kapasitasaun ba Servisu Migrasaun rasik, iha parte infraestrutura postu fronteira hodi hasae atendimentu públiku, hadi’a bein estar pesoál atu nune’e bele motiva di’ak liután iha sira-nia serbisu.
Notísia relevante : Ministru Interiór komprometidu sei dijitaliza Servisu Migrasaun iha pontu entrada
Rejista iha tinan 2025 fó emisaun vistu foun ba ema 11.797 no halo estensaun vistu ba ema 9.355.
Servisu Migrasaun iha tinan 2025 halo emisaun no autorizasaun vistu ba ema 1.583, bazeia ba pedidu Adidu iha rai-li’ur.
“Ho nune’e, durante tinan 2025 Adidu Servisu Migrasaun konsege kontribui reseita ba kofre Estadu hamutuk $100.000-resin,” nia akresenta.
Aleinde ne’e, Adidu Migrasaun halo emisaun garantia vistu ba sidadaun estranjeiru sira.
“Bainhira sira to’o mai iha ita-nia postu fronteira sira halo pagamentu uluk mak ita halo emisaun vistu ba sira,” Diretora esplika.
Jornalista : Natalino Costa
Editora : Julia Chatarina
