Deputadu preokupa ho problema lixu, husu jestaun no konxiénsia komunidade
DILI, 12 Janeiru 2026 (TATOLI)-Deputadu husi Partidu Kongresu Nasionál Rekonstrusaun Timorense (CNRT), Gabriel Soares, preokupa ho kestaun lixu ne’ebé kontinua espalla iha fatin públiku, nune’e husu sidadaun hotu atu iha konxiénsia labele so’e arbiru.
Nia dehan maski serbisu saneamentu munisípiu Dili esforsu hodi ra’ut, maibé lixu kontinua lekar arbiru iha fatin públiku, tanba ne’e presiza kontribuisaun no konxiénsia ema hotu nian hodi halo imajen kapital sai furak.
“Ita foti de’it ezemplu iha fatin Kristu Rei, nu’udar turizmu relijiozu nian, más lixu soe arbiru”, nia levanta iha reuniaun plenária Parlamentu Nasionál, ohin.
Deputadu CNRT, Mateus da Crus, reforsa katak maski Governu konstrui ona valeta, maibé iha semana ne’e nia laran udan boot no halo inundasaun iha fatin lubun iha Dili, tanba impaku husi lixu. Nia husu autoridade munisípiu Dili atu kontrola komunidade ne’ebé soe lixu arbiru. “Depois inundasaun, haree tasi laran lixu plástiku nakonu, tanba laiha konxiénsia”, nia lamenta.
Nune’e mós deputadu husi Partidu Kmanek Haburas Unidade Nasionál Timoroan (KHUNTO), Luís Roberto, husu autoridade munisípiu Dili atu kontrola no halo jestaun di’ak, tanba hafoin selebra Natál no tinan foun lixu barak soe arbiru.
Deputada CNRT, Aliança da Conceição Araújo, mós preokupa kona-ba lixu ne’ebé komesa sai fali ona problema iha país, liuliu iha espasu públiku. “Lixu komesa nakonu iha sidade laran ho munisípiu balun. Husu autoridade munisípiu atu foti medida no haree ba kestaun referida”, nia hato’o.
Hatán ba preokupasaun ne’e, Vise-Ministru ba Asuntu Parlamentár, Adérito Hugo, hateten Governu liuhusi Autoridade Munisípiu Dili kontinua mellora jestaun ba lixu iha Dili mezmu iha tempu feriadu liubá lixu nakonu no ba oin sei hadi’a liután jestaun.
Notísia relevante: AMD kontinua halo jestaun ba lixu iha kapitál Dili
Jornalista: Nelson de Sousa
Editora: Maria Auxiliadora
