Kompañia husi Xina mak kaer projetu estrada Gleno no Letefoho ho kontratu millaun $38-resin
DILI, 09 Janeiru 2026 (TATOLI) – Ministru Obra Públika, Samuel Marçal, fó-sai katak, lansamentu ba estrada urbana Glenu no Letefoho (Ermera) sei realiza iha fulan ne’e ho valór kontratu $38.800.054. Projetu ne’e mak kaer husi kompañia Xina, China Civil Engineering Construction Corporation.
“Projetu rua ne’e ita sei halo lansamentu iha loron 26 to’o 27 fulan-Janeiru 2026, tanba ne’e husu ba povu Ermera sira pasiénsia uitoan, maske prosesu ne’e lori tempu naruk hodi halo negosiasaun,” Ministru Samuel Marçal informa ba Ajénsia TATOLI iha Dili, sesta ne’e.
Governante ne’e mós hatutan, projetu ne’e sei kaer husi empreza internasionál China Civil Enginering Construction Coorporation (Xina) no iha estrada Letefoho kobre kilómetru 30 enkuantu iha Glenu kilómetru 54.
“Tanba hanesan ita hatene katak polítika Governu konstitusionál da-sia hakarak dezenvolve infraestrutura bázika iha área rurál no Ermera hasoru difikuldade barak ona, liuliu kondisaun estrada ladún di’ak hodi fó impaktu ba sira halo movimentu, liuliu iha tempu udan, ha’u sei ba halo asina kontratu projetu ne’e hamutuk ho komunidade sira hodi festeza hamutuk ho sira,” nia katak.
Montante orsamentu $38.800.054 ne’e kobre estrada Glenu ba Letefoho, Humboe ba Ermera Antigu no Estrada urbana Glenu Vila.
Ministériu Planeiamentu no Investimentu Estratéjiku (MPIE) liuhusi Komisaun Nasionál Aprovizionamentu (CNA, sigla portugés) fó-sai ona katak, kompañia China Civil Engineering Construction Corporation husi Xina mak sei kaer projetu Estrada Gleno no Letefoho ho valór kontratu $38,800,054.00.
Komisaun Nasionál Aprovizionamentu (CNA), foti desizaun ne’e bazeia ba númeru 11 hosi artigu 65 hosi Dekretu-Lei númeru 22/2022, hosi loron 11 fulan-maiu, fó-sai ba públiku adjudikasaun hosi kontratu tuirmai, tuir aprovasaun hosi autoridade kontratante.
Nune’e mós artigu 176 hosi Dekretu-Lei Númeru 22/2022, hosi loron 11 fulan-Maiu, keixa hotu-hotu sei hetan atensaun devidamente.
Montante orsamentu $38,800, 054.00 ne’e inklui taxa hotu-hotu ne’ebé aplikavel, projetu ne’e ho númeru TENDER 191/MOP -2024 ho naran Melloria no manutensaun ba trosu rodováriu estrada Letefoho (km 30+230) – Gleno (km 54-370).
Rezultadu konkursu públiku ne’e asina husi Diretór Ezekutivu Komisaun Nasionál Aprovizionamentu, Hermingardo Albano Soares. Maske CNA fó-sai ona, maibé durasaun ba projetu ne’e seidauk fó-sai.
Notisia relevante : Estrada Glenu-Letefoho: Banku Mundiál promove aprovizionamentu bazeia ba dezenvolvimentu sustentavel
Jornalista: Alexandra da Costa
Editór: Evaristo Soares Martins
