VIKEKE, 08 Janeiru 2026 (TATOLI)—Xefe Suku Afalokai, Postu Administrativu Uatulari, Munisípiu Vikeke, Cesário N. Pires solisita Ministériu Obra Públika (MOP) halo normalizasaun ba estrada liga husi Postu Vikeke Vila ba Postu Uatulari no Postu Uatukarbau ne’ebé daudaun ne’e kondisaun grave difikulta movimentu transporte sira.
“Ohin loron ami husi postu rua ba munisípiu terus boot ba estrada, tanba kondisaun estrada iha tempu udan aat no ponte Beaço ne’ebé lokaliza iha Suku Maluru kotu tinan barak ona, maibé seidauk konstrui hikas. Nune’e iha tempu udan mota tun difikulta tebes motorizada no karreta sira tenke hein mota maran mak foin liu,” Cesário ba TATOLI iha Postu Vikeke Vila, Kinta ne’e.
Autoridade lokál ne’e kompara, uluk estrada sei di’ak ne’e ba kapitál Vikeke ho karreta oras rua, maibé agora ba ho karreta bá oras haat hafoin to’o tanba estrada husi Uatulari tun ba Vikeke dalan ku’ak barak no bee nalihun hotu.
“Ami-nia preokupasaun ne’e hato’o beibeik ba Servisu Obra Públika Munisípiu Vikeke maibé dehan estrada nasionál iha hela prosesu. Tan ne’e, ami hanoin prosesu ne’e sei kle’ur karik, MOP koordena ho IGEAD hodi halo uluk normalizasaun dalan kuak sira-ne’e,” nia tenik.
Hatán ba preokupasaun ne’e, Diretór Servisu Obra Públika Munisípiu Vikeke, Casildo Gomes haktuir parte ministériu mós preokupa hotu asuntu ne’e no agora prosesu la’o hela, nune’e husu atu hein prosesu sira-ne’ebé ministériu hala’o.
Jornalista: Vitorino Lopes da Costa
Editór: Xisto Freitas da Piedade
