KOVALIMA, 08 Janeiru 2026 (TATOLI) – Diresaun Munisipál Transporte no Komunikasaun (DMTK) Kovalima durante Janeiru to’o Dezembru 2025, konsege kontribui ona reseita $117.711 ba kofre Estadu.
“Reseita ne’ebé maka ita kontribui ba kofre Estadu nia fonte orsamentu mai husi inspesaun veíkulu hanesan karreta no motorizada, lisensa tranzitu, karta kondusaun, halo rejistu, xapa mátrikula lakon no troka xapa mátrikula no mós sidadaun sira uza transporte viajen ba Indonésia mak nia totál hodi reseita hamutuk $117.711 ba kofre Estadu”, Diretór Servisu Munisipál Transporte Komunikasaun, Joaquim Gusmão, relata ba TATOLI, iha Bairu Kosta, ohin.
Reseita ne’ebé mak DMTK arrekada iha tinan ne’e maka’as liu kompara ho tinan 2024 ne’ebé kontribui de’it $96,600.
Reseita ne’ebé maka DMTK kontribui hamutuk $117.711 ho totál invoice hamutuk 8,194 ne’ebé mai husi inpesaun nia invoice 5.826 ho nia orsamentu hamutuk $81.660 lisensa tranzitu ho nia invoice 182 ho nia orsamentu $5.335.
Aleinde ne’e mai husi karta kondusaun invoice 271 ho nia orsamentu $5.030,00, halo rejistu veíkulu ho invoice 1,529 nia orsamentu $22.506, xapa lakon invoice 65 orsamentu $920, troka xapa nia invoice 19 orsamentu $475 no sidadaun sira uza transporte dezloka ba Indonézia ho invoice 10 ho totál orsamentu $ 100 no DSPL invoice 292 ho orsamentu $1.685.
Tanba tuir regra sidadaun ne’ebé mak viajen ba Nasaun viziñu Indonézia uza transporte hanesan karreta semana rua sei selu osan $5, durante ne’e kada loron DMTK atende sidadaun na’in ida ka rua maka uza karreta privadu hodi halo viajen ba Indonézia.
Jornalista: Celestina Teles
Editór: Florencio Miranda Ximenes
