KOVALIMA, 08 Janeiru 2026 (TATOLI)– Eskola Sekundáriu Jerál Públiku (ESGP) Suai, realiza ona orientasaun ba estudante foun na’in-480 ho maneira edukativa liuliu forma karakter, hahú loron 8 Janeiru sei termina iha loron-10.
“Alunu foun ne’ebé maka tuir orientasaun tinan akadémiku 2026 tuir loloos hamutuk 540, maibé foin lalais rejistu hetan de’it na’in-480, nune’e sira hahú tuir ona orientasaun ne’ebé maka eskola fó ho maneira edukativu. No la autoriza atu hamosu violénsia”, Prezidente Komisaun Estudantil, Sergio Amaral, informa ba jornalista sira, iha eskola Sekundáriu Públiku Suai, ohin.
Durante eskola hala’o orientasaun eskola konvida Servisu Munisipál Edukasaun, Komandu Polísia Nasionál Timor-Leste (PNTL) no Sub-KRAM munisípiu Kovalima hodi partilla informasaun ida-idak nia servisu ba alunu sira.
Prosesu hala’o orientasaun eskola orienta atu labele hamosu violénsia, atu eduka alunu foun fó koñesementu ba alunu foun sira hodi partilla informasaun kona-bá lalaok eskola la’ós atu hamosu violénsia.
Jornalista: Celestina Teles
Editór: Florencio Miranda Ximenes
