KOVALIMA, 09 Janeiru 2026 (TATOLI) – Progresu Konstrusaun Programa Nasionál Dezenvolvimentu Suku (PNDS) iha munisípiu Kovalima iha 2025 ne’e, hamutuk pakote 31 atinje ona 95,67% .
“Iha tinan 2025, implementa projetu PNDS iha suku 30 ho totál projetu hamutuk 31, daudaun nia progresu konstrusaun fíziku atinje ona 95%. Projetu 31 ne’e kuaze projetu 27 mak finaliza ona no hein entrega ba komunidade. Falta projetu haat mak seidauk finaliza maibé nia progresu konstrusaun kuaze konklui ona”, Diretór Servisu Munisipál Kovalima ba asuntu PNDS, Pedro de Araújo Gomes, relata ba jornalista sira iha nia servisu fatin, ohin.
Projetu PNDS haat ne’ebé mak seidauk finaliza hanesan iha postu administrativu Tilomar ihabprojetu rua ho tipu projetu estrada ne’ebé aterru ho simente husi suku Beiseuk bá aldeia Wala, konstrusaun uma Merenda Eskolár iha Suku Lalawa, reabilitasaun bee moos iha suku Belulik leten no iha postu administrativu Fatumea iha aldeia Belelulik kraik no iha postu administrativu Maucatar, suku Holpilat mak projetu konstrusaun rezidénsia ba profesór sira.
Razaun projetu haat ne’e seidauk finaliza tanba hasoru difikuldade iha fornesedór materiál husi fornesedór sira difisil atu reponde.
Iha 2025 ne’e, PNDS implementa projetu 31 nia foku iha setór importante sira hanesan, setór bee no saneamentu dada bee-moos ba komunidade ,Obra Públika hanesan nahe estrada, iha setór saúde mak konstrui rezidénsia ba enfermeiru no médiku sira no kontruisaun morru ba klínika, iha setór edukasaun halo konstrusaun uma merenda eskolár aumenta sala aula no setór Agrikultura foku konstrusaun irrigasaun.
Alokasaun orsamentu ba PNDS iha 2025 ne’e hamutuk $1,451,805.00 ne’ebé aloka ba saláriu no vensimentu $290,814.00, bens no servisu $115,278.00 no aloka ba kategória trasferénsia públika $969,762.81.
Orsamentu ne’ebé maka aloka ba PNDS 2025 nia ezekusaun atinje ona 98.7% ho totál $1,451,805.00 ne’ebé ezekuta ona $1,338,073.57 no nia balansu $113,731.43.
Orsamentu ne’ebé maka aloka ba fundu operasionál no infra-estrutura hamutuk $1,045,713.00 nia progresu ezekusaun projetu atinje ona 95,67% hodi implementa projetu 31 iha munisípiu Kovalima.
Jornalista: Celestina Teles
Editór: Florencio Miranda Ximenes
