DILI, 08 Janeiru 2026 (TATOLI)—Ministru Obra Públika, Samuel Marçal, informa iha tinan 2026 ne’e Governu Konstitusionál da-sia (IX) sei kontinua halo alargamentu estrada husi diresaun Bidau Akadiruhun to’o iha parte Katedrál Vila Verde nian.
“Ita iha ona planu, tinan ida-ne’e atu loke alargamentu iha estrada protokolu iha parajen mikrolete Bidau Akadiruhun tun to’o katedral nian, entaun pasiésia uitoan ita sei hadi’a mós estasionamentu mikrolete nian,” Ministru Obra Públika, Samuel Marçal hateten ba jornalista sira iha Palásiu Governu, kuarta ne’e.
Tanba, nai dehan, problema boot iha sidade Dili ne’e mak tráfegu maibé tanba karreta para arbiru, nune’e Polísia Tránzitu mak tenke haree asuntu ida-ne’e, tanba se ema para karreta arbiru sei la rezolve problema engarafamentu.
“Iha prosesu alargamentu ne’e sei sobu mós komunidade afetadu balun ne’ebé okupa espasu estrada nian. Maibé, ha’u apresia tebes ho ita-nia komunidade hela iha dalan rohan, iha kolaborasaun di’ak tebes no ha’u fiar katak hotu-hotu hakarak dezenvolvimentu,” nia dehan.
Nia afirma, liuliu sidade Dili nu’udar kapitál presiza hotu-hotu nia koolaborasaun di’ak atu kria sidade sai furak foti identidade imajen Timor nian.
Jornalista : Alexandra da Costa
Editór : Cancio Ximenes
