KOVALIMA, 09 Janeiru 2026 (TATOLI) – Agrikultór sira husi Postu administrativu Zumalai, munisípiu Kovalima, hahú halai natar ba époka dahuluk tinan 2026 ho ektare 5.000 la inklui loke área foun.
“ Ita nia agrikultór sira hahú halai natar ba époka dahuluk ni’an, nune’e ami kontaktu ona diresaun nasionál parte irrigasaun tanba Ministériu Agrikultura, Peska, Pekuáriu no Floresta suporta mákina pezadu hanesan eskapatór bainhira mota tuun estraga kanu mákina pezadu bele normaliza bee dalan atu distribui bee ba natar ”, Diretór Servisu Munisipál Agrikultura Kovalima, Lino Magno hato’o ba jornalista sira, iha Tabakolok, ohin.
Diretór Agrikultura Kovalima ne’e, segunda semena oin, mákina pezadu sira dezloka husi nasionál mai iha munisípiu Kovalima hodi ajuda natar na’in sira ne’ebé maka presiza hodi distribui bee ba natar, nune’e bele hasa’e produsaun haree kulit iha rai-laran.
Tuir dadus iha servisu agrikultura munisipál Kovalima iha époka dahuluk ne’e, natar na’in sira sei halai natar ektare 5000, maibé foin lalais loke mós área foun hamutuk ektare 50 iha Holgonegas no iha Lonkulu ektare 25 ne’ebé maka durante ne’e abandonadu.
Agrikultór sira ne’ebé maka daudaun halai natar ba époka dahuluk maioria husi postu administrativu Zumalai, postu Suai iha Suku Beco, maibé iha Suku Suai Loro ho Debos seidauk tanba seidauk distribui bee ba natar.
Entertantu, Servisu agrikultura munisipál Kovalima prepara fini hare kulit impari 32, hamutuk tonelada 12 husi númeru ne’e tonelada 8 maka distribui ona ba agrikultór sira hanesan iha postu administrativu Zumalai no tonela haat sei rai iha armazein.
Jornalista: Celestina Teles
Editór: Florencio Miranda Ximenes
