Embaixadór Japaun Yamamoto entrega karta kredensiál ba Xefe Estadu
DILI, 09 Janeiru 2026 (TATOLI)–Embaixadór Japaun ba Timor-Leste, Yamamoto Yasushi, sesta ne’e, entrega karta kredensiál ba Prezidente Repúblika, José Ramos-Horta, antes hala’o misaun diplomata iha Timor-Leste.
Embaixadór Yamamoto nia misaun diplomata iha Timor-Leste hodi troka Embaixadór sesante Kimura ne’ebé ninia misaun termina ona iha tinan kotuk.
“Ami mai akompaña Embaixadór foun husi Governu Japaun mai Timor-Leste, hodi troka Embaixadór anteriór Kimura, entaun nia mai ne’e atu entrega kredensiál ba ita-nia Prezidente. Ita hatene katak Timor-Leste iha relasaun ida-ne’ebé di’ak tebes ho Japaun,” Ministru Negósiu Estranjeiru no Kooperasaun (MNEK), Bendito dos Santos Freitas, hateten ba jornalista sira.
Nia dehan, Timor-Leste ho Japaun iha kooperasaun ida-ne’ebé fundamentál tebes iha área setór hotu ba dezenvolvimentu hanesan ekonomia, sosiál no seluk tan.
“Prezensa Embaixadór foun nian, Yamamoto, ne’ebé aprezenta nia kredensiál, nia sei dezempeña papel di’ak-liu atu fó kontinuidade ba misaun ne’ebé Embaixadór anteriór hala’o ona,” nia dehan.
Durante Embaixadór Yamamoto hato’o nia kredensiál, Prezidente Repúblika José Ramos-Horta espresa apoiu totál ba misaun Embaixadór foun ne’e.
“Ita-nia Prezidente dezafia Embaixadór foun bele halo di’ak liután servisu hotu ne’ebé Embaixadór anteriór husik hela hodi hametin liutan kooperasaun di’ak entre nasaun rua (2) ne’e,” Ministru Bendito dehan.
Jornalista : Hortencio Sanchez
Editór : Cancio Ximenes
