DILI, 09 Janeiru 2026 (TATOLI)—Ministru Edukasaun Interinu, Domingos Lemos Lopes, Sesta ne’e, sorumutu ho delegasaun husi Fundasaun Japaun, ne’ebé lidera husi Asesór ba Estudu Japaun, Parseria Globál, Jestaun Marka no Komunikasaun, Yuri Sato, hodi diskute kooperasaun iha programa sira ne’ebé fó apoiu ba formasaun profesór no interkámbiu estudante sira iha ensinu tékniku no vokasionál estudante nian.
Reprezentante Fundasaun Kooperasaun Japaun Interkámbiu, Yuri Sato hateten Ministériu Edukasaun (ME) hatudu interese atu fó dalan ba estudante ensinu vokasionál no tékniku sira atu aprende mós lian Japaun.
“Fundasaun Japoneza foka liubá promove ensinu lian Japaun nian. Ami hakarak estabelese kooperasaun ka haruka espesialista lian Japaun nian hodi hanorin lian Japaun ba profesór lokál sira, liuliu sira-ne’ebé iha eskola vokasionál no téknika,” nia dehan ba jornalista sira iha Vila-Verde, Dili.
Responsavel ne’e dehan atu formaliza akordu ida entre Fundasaun Japaun ho Ministériu Edukasaun hakarak mós promove kultura no lian japoneza iha Timor-Leste, ho objetivu atu ajuda joven timoroan sira hodi aplika ba pozisaun potensiál sira iha Japaun.
Nune’e mós, Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos haktuir enkontru ohin ne’e nu’udár enkontru prelimináriu entre Fundasaun Japaun ho Ministériu Edukasaun hodi ko’alia kona-ba formasaun lian japoneza.
“Ami-nia proposta ba Fundasaun Japaun mak atu oferese formasaun ba joven sira hosi Timor-Leste liuhosi Ensinu Tékniku Vokasionál, nune’e sira aprende lian Japaun. Hafoin ne’e, ami sei lori joven sira hosi nasaun rua hodi fahe esperiénsia progresu sira no aprende kona-ba kultura entre nasaun rua,” nia hateten.
Responsavel ne’e hatutan katak projetu formasaun ne’e sei oferese uluk ba profesór sira hafoin sei habelar ba estudante sira.
Jornalista: Osória Marques
Editór: Xisto Freitas da Piedade
