VIKEKE, 09 Janeiru 2026 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes informa hahú husi fulan-Janeiru to’o Dezembru 2025, PNTL Munisípiu Vikeke rejista kazu violénsia doméstika (VD) hamutuk 90.
“Kazu ne’ebé rejistadu ho númeru aas iha Munisípiu Vikeke mak kazu VD ho totál hamutuk 90. Kazu VD ne’e ita konsidera hanesan krime públiku, nune’e bainhira ita-nia sidadaun sira mai halo keixa ami tenke submete ba Ministériu Públiku (MP) hodi kontinua prosesa bá tribunál,” António ba TATOLI iha Postu Vikeke Vila, Sesta ne’e.
Nia esplika kauza husi kazu VD akontese fatór maihusi problema ekonomia família no kauza ida seluk mak sidadaun sira-nia preparasaun forma família seidauk sufisiente maibé obriga malu forma ona família.
“Kazu sira-ne’e la’ós polísia nia servisu de’it, maibé presiza apoiu husi parte sosiedade no governu ita hamutuk para halo redusaun ba kazu VD,” nia enkoraja.
Jornalista: Vitorino Lopes da Costa
Editór: Xisto Freitas da Piedade
