DILI, 10 Janeiru 2026 (TATOLI)—Governu liuhusi Primeiru-Ministru Kay Rala Xanana Gusmão, Sábadu ne’e, inaugura ona estrada diresaun Kairavela, Suku Kampung Baru, Postu Administrativu Vemasse bá Aeroportu Baukau, Suku Tirilolo, Postu Administrativu Baukau Vila.
Estrada referida ho distánsia kilómetru ualu-resin iha-ne’ebé fahe ba pakote rua no pakote dahuluk konstrui iha VI Governu Konstitusionál tinan 2015 no pakote daruak kontinua iha inísiu tinan 2025 ne’ebé responsavel husi kompañia rua hanesan DVP Konstrusaun Unipessoal, Lda no Centrál Hill Unipesóal, Lda.
Iha seremónia inaugurasaun, Xefe Governu apela ba komunidade iha área Kairavela no Kaisidu liuliu juventude ne’ebé sai benefisiáriu atu utiliza estrada referida ho kuidadu no kontribui atu labele estraga fasilidade ne’ebé monta ona nune’e fasilita movimentasaun transporte iha área ne’e.
“Imi hotu-hotu liuliu joven sira tenke sente katak estrada ne’e imi-nian. Labele estraga sasán sira-ne’ebé mak monta iha estrada ne’e,” Xanana Gusmão apela iha Kaisidu, Tirilolo.
Iha fatin hanesan, Prezidente Autoridade Munisípiu Baukau, Veneranda E. M. Lemos Martins, hato’o agradese ba Governu lideradu hosi Primeiru-Ministru, Kay Rala Xanana Gusmão ne’ebé implementa obra ida-ne’e no ohin inaugura atubele fasilita movimentu komunidade ho di’ak.
“Ba komunidade bainhira ita garante pás no estabilidade mak dezenvolvementu sei mai iha ita-nia munisípiu,” Veneranda hato’o mensajen.
Entretantu, projetu referidu tuir data kontratu hahú serbisu iha inísiu janeiru 2025 no termina iha inísiu tinan 2026 ne’ebé responsavel husi kompañia rua hanesan DVP Konstrusaun Unipessoal, Lda valór orsamentu $4.386.542,91 no Central Hill Unipessoal, Lda ho valór orsamentu $2.537.086,94.
Jornalista: Natalino Belo
Editór: Xisto Freitas da Piedade
