DILI, 12 Janeiru 2026 (TATOLI)-Komisáriu Autoridade Aduaneira (AA)/Alfándega, Joanico Pinto, informa katak Alfándega sei selebra Loron Mundiál Alfándega no aniversariu Alfándega Timor-Leste ba da-26 iha Oekusi.
Tema prinsipál ba komemorsaun tinan ne’e mak “Reflete ba Kotuk no Hamutuk Avansa Nafatin”.
Joanico Pinto esplika katak Loron Mundiál Alfándega no aniversariu ba Alfándega ne’e selebra hamutuk iha kada tinan, iha loron 28 Janeiru.
Razaun AA komemora iha Oekusi, tanba bazeia ba orientasaun Primeiru-Ministru, Xanana Gusmão, nian iha tinan kotuk.
“Ami mós hahú ona fó formasaun ba sira-nia ema iha ne’ebá iha tinan kotuk no sei kontinua. Hanorin buat hotu liga ba sistema, liuliu liga ba reseita, nune’e selebrasaun ne’e hotu Oekusi nia kolesaun ba reseita ne’e sei integrga mai iha sistema nasionál ne’e”, Joanico Pinto hateten iha Ministériu Finansa, Aitarak-Laran, Dili, ohin.
Nia haktuir katak kona-ba eventu ne’e, daudaun estabelese ona komisaun no halo preparasaun hodi organiza atividade sira, nune’e to’o 28 Janeiru ne’e bá halo selebrasaun finál iha Oekusi.
Atividade sira ne’ebé sei hala’o iha Oekusi antes komemora aniversáriu mak halo sosializasaun ba komunidade, sosiedade sivíl, relijiozu sira ne’ebé besik fronteira sira kona-ba regra sira importasaun no esportasaun ninian liuhusi dalan legál hodi kontribui reseita ba Governu.
“Bainhira sira kompreende ona regra sira ne’e mak sei la akontese ilegál ne’e. Sosializasaun ne’e sei halo parte rua mak iha Sakato no Oesilu nian. Ita sei sosializa oinsá sasán ne’ebé lori tama-sai ho nia kustu hodi kontribui ba reseita ne’e”, dehan.
Aleinde ne’e, Alfándega mós sei realiza atividade hanesan halo avaliasaun serbisu anuál hodi identifika progresu, dezafiu, no oinsá atu rezolve, nune’e bele kontribui di’ak ba iha futuru no ikus taka ho misa agradesimentu.
Notísia relevante: Portu Tíbar sai kontribuidór prinsipál ba reseita Alfándega iha 2025
Jornalista: Arminda Fonseca
Editora: Maria Auxiliadora
