DILI, 12 Janeiru 2026 (TATOLI)—Embaixadór Timor-Leste ba Estadu Unidu Amérika, José Luís Guterres hala’o enkontru ho Primeiru-Ministru, Kayrala Xanana Gusmão, hodi entrega rekatóriu servisu no relata situasaun atuál iha EUA.
“Objetivu ha’u mai iha ne’e atu fó relatóriu servisu iha embaixada Timor nian iha Estadu Unidu nian no mós fó pontus situasaun ba Primeiru-Ministru kona-ba relasaun ne’ebé ita iha entre nasaun rua. Nune’e atu informa ba imi hotu katak mundu ohin loron enfrenta situasaun ne’ebé defisíl, la’ós fasíl,” Embaixadór ne’e hateten ba jornalista sira iha Palásiu Governu, ohin.
Maibé, nia dehan, hanesan timoroan bele laran ksolok tanba Governu Konstitusionál da-sia (IX) no Estadu Timor-Leste iha polítika ne’ebé ponderavel no nasaun seluk mós komprende Timor-Leste nia polítika.
“Ha’u agradese ba tempu ne’ebé Primeiru-Ministru fó no ha’u mós sei ba aprezenta Prezidente Repúblika hodi fó relatóriu servisu ida-ne’e,” nia hateten.
Mensajen ne’ebé Primeiru-Ministru hato’o ba nia hanesan embaixadór ida-ne’ebé servisu lori Estadu Timor nia naran iha Washington (EUA) tenke iha obrigasaun atu fó informasaun servisu ne’ebé halo no mós polítika jerál iha EUA nian no evolusaun ba oin.
“Tanba atu nune’e governante sira bele akompaña situasaun ne’e ho di’ak, nune’e mak objetivu ohin hasoru malu ho Primeiru-Ministru. Maske iha difikuldade maibé ne’e normál importante maka bele hatene polítika EUA nian ho di’ak,” nia dehan.
Jornalista : Akexandra da Costa
Editór : Cancio Ximenes
