DILI, 12 Janeiru 2025 (TATOLI)—Diretóra Ezekutivu Institutu Nasionál Farmásia Produtu Medikamentu (INFPM), Paulina Mendonça, hateten estoke ai-moruk iha armajen Institutu Nasionál Farmásia Produtu no Médiku daudaun ne’e 88% kompostu husi esensiál, vitál no nesesáriu ne’ebé sei garante ba iha fulan tolu hanesan Janeiru, Fevereiru no Marsu hafoin halo akizisaun ba tinan 2026.
“Estoke ai-moruk ne’ebé mak disponivel agora daudaun iha armajen nasionál nian iha 88%, kompostu husi esensiál 89%, Vitál 91% no nesesáriu 79% ba iha totál mak 88% no stock out 9%,” Diretora Ezekutiva INFPM, Paulina Mendonça, hateten ba jornalista sira iha nia kna’ar fatin, Kampung Alor, ohin.
Nia dehan, ho estoke ai-moruk ne’ebé mak daudaun ne’e iha armajen nasionál sei garante to’o fulan-Marsu iha tinan 2026.
Nia afirma, akizasaun ba tinan 2025 ne’e ramata ona no ikus liu Govenu Japaun apoiu no daudaun ne’e iha hela Portu Tibar.
” Hela iha Portu Tibar hein hela prosesu ba selu taxa, tanba aimoruk sira-ne’ebé mak durante ne’e INFPM sosa regulár no mós emerjénsia tanba ai-moruk ne’e esensiál la’ós hanesan sasán operasionál maibé ida-ne’e médikamentu ne’ebé halai ba ema-nia vida. Entaun, karik iha emerjénsia ruma ami kompra de’it emerjénsia maibé sosa normál mós ami halo hotu,” nia dehan.
Jornalista : Felicidade Ximenes
Editór : Cancio Ximenes
