DILI, 12 Janeiru 2026 (TATOLI) – Kargu xefia sira hamutuk 182 iha Ministru Agrikultura, Pekuária, Peska no Floresta (MAPPF) simu pose hodi asume pozisaun sira hanesan Diretór -Jerál, Inspetór-Jerál, Diretór Nasionál, Xefe Departamentu Nasionál no Xefe Delegasaun Serbisu Territoriál ba Setór Floresta no Peska, inklui Xefe Gabinete ba Diretór Nasionál sira.
Ministru tutela, Marcos da Cruz, hateten kargu xefi sira ne’ebé simu pose ne’e balun kontinua funsaun no balun foin mak simu kargu.
“Pose ne’ebé ohin ita realiza ida-ne’e ho objetivu atu reforsa serbisu ministériu nian hodi ezekuta Orsamentu Jerál 2026 ne’e ho kualidade no bele di’ak liu tinan uluk nian”, governante hateten iha salaun MAPPF, Komoro, Dili.
Hafoin pose ministru husu emposadu sira atu hala’o responsabilidade ne’e ho di’ak, tanba ida-ne’e la’ós oportunidade. “Presiza lealdade, responsabilidade tuir juramentu ne’ebé imi halo, nune’e bele atinje objetivu ne’ebé ita hakarak. Tanba ita tama ona ba Organizasaun Mundiál Komérsiu no ASEAN, tenke esforsu hodi hasa’e produsaun rai-laran hodi responde ba nasaun nian no esporta mós”, afirma.
Sekretáriu Estadu Floresta, Fernandino Vieira, realsa katak simu pose ida-ne’e kompromisu de onra ida ba kargu xefia sira, hanesan responsabilidade serbisu tuir área ne’ebé sira hetan.
“Ida-ne’e la’ós oportunidade, maibé responsabilidade ne’ebé hetan konfiansa husi superiór ba imi. Tenke serbí ho di’ak, tanba povu sei presiza ita. La’ós simu tiha kargu serbisu tuir idaidak nia hakarak, serbisu tenke ekipa no koopera malu, tanba ita nu’udar dapur nasaun nian. Nune’e, ita tenke presiza ekipa ne’ebé forte atu hamenus produtu importasaun no hasa’e produsaun”, dehan.
Komisáriu Funsaun Públika ba Portfóliu ba Planeamentu Forsa Traballu, José Telo Cristovão, dehan pose ida-ne’e nu’udar serimónia dahuluk iha tinan ne’e hodi hatudu katak instituisaun ida-ne’e prontu atu halo serbisu hodi atinje objetivu sira iha 2026 nian.
Tuir nia, kargu diresaun no xefia sira nu’udar motór ida ne’ebé dudu no mobiliza instituisaun ida-ne’e ninia avansu no aselera serbisu sira ba to’o nia finalidade.
“Serbisu hamutuk mak sai baze fundamentál. Ami-nia papél mak atu apoiu ita-boot sira iha administrasaun públika, funsionáriu públiku sira, no ami-nia odamatan nakloke nafatin bainhira de’it ita-boot sira presiza ami”, nia realsa.
Jornalista: Arminda Fonseca
Editora: Maria Auxiliadora
