DILI, 12 Janeiru 2026 (TATOLI)—Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos hateten Ministériu Edukasaun (ME) hatuun ona despaxu ba Diresaun Rekursu Umanu no halo ona xamada ba profesór bolsa kandidatura sira-ne’ebé seidauk kolokadu.
Tuir nia katak relasiona ho profesór rihun ida-resin ne’ebé reforma hodi fó impaktu ba prosesu aprendizajen ba eskola sira. Nune’e, Ministériu Edukasaun halo ona xamada ba profesór bolsa kandidatura sira atu kompleta dokumentu hodi substitui profesór reformadu sira.
“Tanba ida-ne’e mak horisehik ita-boot sira akompaña iha mídia katak ita sei halo kolokasaun ba faze ida ikus ne’e, nune’e rekursu umanu mós hasai ona sirkulár ida atu apela ba bolsa kandidatu sira hotu ne’ebé sei iha bolsa atu kompleta ona dokumentu,” nia dehan ba joranalista sira iha ME Vila-Verde, Segunda ne’e.
Lopes Lemos dehan Ministériu Edukasaun orienta ona dirijente sira hotu, atu halo identifikasaun ba profesór sira-ne’ebé butuk iha fatin ida atu koloka imediatamente ba eskola ne’ebé enfrenta menus profesór.
“Iha tempu badak profesór sira-ne’ebé butuk iha fatin balun, imediatamente tenke halo kolokasaun ba eskola sira-ne’ebé presiza. Depoiz ita-nia bolsa kandidatu sekundáriu ho ensinu báziku ne’ebé daudaun iha bolsa ita koloka tuir ba,” nia subliña.
Entretantu, dadus profesór ensin báziku ne’ebé iha bolsa kandidatu seidauk koloka hamutuk 903 no ensinu sekundáriu hamutuk 400-resin
Bazeia ba desizaun ministeriál númeru 5/2025, loron-13 Fevereiru 2025, ne’ebé aprova atualizasaun lista finál bolsa kandidatu ensinu báziku 1.⁰ no 2.⁰ hodi prenxe vaga iha iha kuadru pesoál ensinu báziku públiku sira no despaxu ministeriál númeru: 32/GM-ME/X/2025, 10 Outubru ne’ebé aprova bolsa kandidatu bolsa ensinu sekundáriu jerál no tékniku vokasionál.
Nune’e, fó-hatene ba kandidatu profesór iha lista espera ba grupu rekrutamentu ensinu báziku (EB) 1.⁰ no 2.⁰ siklu, no mós grupu rekrutamentu 12.⁰ husi sekundáriu jerál, atu prepara dokumentu sira antes xamada.
Jornalista: Osória Marques
Editór: Xisto Freitas da Piedade
