DILI, 12 Janeiru 2026 (TATOLI)—Ministru Ensinu Superiór, Siénsia no Kultura, José Honório da Costa Pereira Jerónimo informa Ministériu Ensinu Superiór, Siénsia no Kultura (MESSK) iha planu sei publika lista finál estudante ne’ebe atu asesu ba Universidade Nasionál Timor Lorosa’e ’e (UNTL) no Institutu Politékniku Betanu (IPB) iha Janeiru ne’e nia rohan.
Tuir nia katak daudaun ne’e parte téknika halo hela korresaun ba rejime oportunidade, tanba ne’e tenke haree ida bá ida. Ezemplu, valór 65 ne’e tenke simu hotu, nune’e sei iha prosesu nia laran.
“Nune’e, kada rejime sira-ne’e estudante hira-hira ita seidauk bele fó-sai tanba sei iha prosesu korresaun hela. Tanba ne’e, ha’u husu ba tékniku sira servisu ho profesionál, para ita bele hetan rezultadu ne’ebé di’ak no estudante ne’ebé asesu ba UNTL tenke iha kapasidade di’ak, maibé klaru katak iha finde Janeiru sei públika ona rezultadu,” nia ba jornalista sira iha nia kna’ar fatin, Kolmera, Segunda ne’e.
Governante dehan estudante ne’ebé atu asesu ba UNTL ho IPB hamutuk 4.000-resin.
“Ita haree dalaruma bele liu tanba valór hanesan barak. Ha’u fó ezemplu valór mínimu 52, maibé valór ne’e barak, entaun tenke tama hotu. Ida ne’e inklui ona rejime oportunidade no rejime espesiál tanba sira-ne’e mós tuir teste,” José esplika.
Nia dehan, atu pasa ka la pasa, ida-ne’e depende ba sira-nia valór. Karik valór di’ak sira bele asesu ba UNTL. Karik valór ladi’ak sira labele asesu.
Jornalista: Osória Marques
Editór: Xisto Freitas da Piedade
