PD apela ba unidade no konsensu entre líder polítiku sira
DILI, 12 Janeiru 2026 (TATOLI)-Iha sesaun plenária Parlamentu Nasionál dahuluk ba tinan 2026, Bankada husi Partidu Demokrátiku (PD) halo apelu ba unidade husi bankada parlamentár sira no hamutuk serbí no halo diálogu ho líder partidu polítiku sira atu haree ba dezafiu país nian.
Xefe Bankada PD, Armando Lopes, dehan país kompleta, iha tinan ne’e, ukun rasik-an ba da-24 hanesan tinan 24 hasoru invazaun.
Nune’e, iha sesaun plenária dahuluk tinan ne’e, nia hakarak sita finalidade ukun rasik-an ida-ne’e atu hothotu hakarak luta hamutuk ba povu nia moris ho livre, justu, prósperu no dignu.
Aliña ho pensamentu ida-ne’e mak intrepreta ba polítika Governu Konstituisionál Dasiak husi 2025 hahú marka nia repozisaun polítika hodi toma asaun nesesidade povu hanesan estrada, ponte, irrigasaun, eletrisidade, bee-moos, saúde, edukasaun, dezenvolvimentu ekonómika no importante ida mós mak estabilidade polítika.
“Ho inísiu tinan 2026 ida-ne’e, mai ita hamutuk kontribui ba polítika Governu Dasiak, ne’ebé implementa hela hodi responde ba nesesidade povu nian”, nia hato’o iha intervensaun iha reuniaun plenária dahuluk iha Parlamentu, ohin.
Deputadu ne’e dehan lejislativa hirak ne’ebé liu ona husi lejislatura sira ne’e iha lisaun barak mak povu akompaña no avalia atitude debate sira iha Parlamentu. “Nune’e iha sesaun plenária dahuluk, ita hotu reprezentante povu, lian povu mai hamutuk haklaken adeus konflitu, benvindu unidade, asaun progresu hodi destina kada pasu povu nia vida ho Orsamentu Jerál Estadu (OJE) 2026 ida-ne’e”, nia apela.
Nia husu atu hamutuk ho Governu hodi garante OJE ne’ebé Estadu administra hela uza ho di’ak no loloos ba interese povu nian.
“Orsamentu povu nian tenke prioriza ba dezenvolvimentu públiku, serbisu báziku no programa sosiál sira ne’ebé bele hadi’a kondisaun povu nia moris hanesan edukasaun, saúde, infraestrura bázika no hadi’a ekonomia lokál, lori prinsípiu transparénsia prestasaun konta no justisa sosiál iha prosesu planeamentu no ezekusaun orsamentu hodi prevene uza osan ba particular”, nia afirma.
Nune’e mós deputadu PD, Mariano Malik, hateten ho tinan foun ne’e sai nu’udar tinan haksolok ba timoroan hothotu no tinan konsolidasaun pensamentu nasaun husi líder polítiku sira oinsá halo konsentrasaun ba konsensu polítiku ida hodi fó resposta ba dezafiu nasaun nian hanesan iha hela diskusaun fronteira terrestre no tasi ho Indonézia no asuntu seluk tan.
Jornalista: Nelson de Sousa
Editora: Maria Auxiliadora
