Ramos-Horta enkoraja funsionáriu Palásiu Prezidensiál servisu ho profisionalizmu
DILI, 12 Janeiru 2026 (TATOLI)—Prezidente Repúblika, José Ramos-Horta, husu ba funsionariu hotu ne’ebé serbisu iha Palásiu Prezidensiál atu servisu ho profisionalizmu hodi serbí povu no nasaun.
Xefe Estadu hateten, nesesidade urjente ba avaliasaun dezempeñu, formasaun kontinua no kapasitasaun profisionál hanesan pilar importante atu moderniza administrasaun públika iha Timor-Leste.
Kona-ba padraun internasionál sira husi governasaun, Xefe Estadu husu tranzisaun efetiva ida ba meritokrasia duké partidarizmu, hodi destaka katak funsaun públiku profisionál ida tenke prioriza iha produtividade, iha responsabilizasaun no prezervasaun memória institusionál, atu serbi povu ho efikásia no dignidade povu Timor nian.
“Marku prinsipál sira husi futuru oin mai, inklui eleisaun prezidensiál 2027 no Timor-Leste nia papél istóriku nu’udar Prezidénsia ASEAN nian iha 2029, salienta importánsia husi administrasaun públika ida-ne’ebé preparada, estruturada no orientada ba rezultadu, bele hatán ba dezafiu no responsabilidade internasionál sira nsaun nian,” Xefe Estadu hateten liuhusi nota ne’ebé TATOLI asesu husi mídia Palásiu Prezidensiál, ohin.
Prezidente destaka mós avansu importante sira ekonómiku nian, hanesan estaleiru navál Laleia no investimentu enerjia renovável sira, sai nu’udar ezemplu loloos husi kompromisu nasionál ho kriasaun servisu, kreximentu sustentável no hametin ligasaun diplomátika ho parseiru rejionál no internasionál sira.
Iha finál interversaun, Prezidente Ramos-Horta hametin nesesidade dixiplina iha servisu-fatin no anúnsia inisiativa foun ba apoiu sosiál ba funsionáriu sira-ne’ebé tama ona reforma, no husu espíritu foun ba unidade interna no integridade institusionál no dedikasaun ba servisu públiku, hodi husu ba kolaboradór sira hotu serbi Estadu ho onra, lealdade no dedikasaun tomak iha misaun.
Jornalista : Hortencio Sanchez
Editór : Cancio Ximenes
