DILI, 13 Janeiru 2026 (TATOLI)—Sekretáriu Estadu Komunikasaun Sosiál, Expedito Dias Ximenes, informa xefe redasaun na’in-10 husi plataforma mídia RTTL, E.P, Agência Tatoli, Timor Post, STL, Corp, Dili Post, GMN, SapNews, Lafaek News, Jornál Independente, Smnews, sei aranka ba Indonézia hodi halo estudu komparativu durante loron rua iha Bali.
Objetivu sira ba halo estudu komparativu atu observa direta kondisaun mídia sira iha nasaun seluk atu bele aprende esperiénsia foun kona-ba jestaun mídia no programasaun nian.
“Estudu komparativu ida-ne’e liuliu iha área jestaun mídia nian, jestaun kobertura, programasaun inklui haree mídia konvensionál sira iha ne’ebá, nune’e sira fila mai bele hadi’a fali jestaun iha ida-idak nia mídia,” Sekretáriu Estadu informa ba jornalista sira iha salaun enkontru KI, Kintal Boot, ohin
Governante ne’e hatutan, estudu komparativu ida-ne’e sei halo rotasaun hodi fó biban ba xefe redasaun sira hotu atu partisipa, katak programa tuir fali mai sei lori fali sira-ne’ebé seidauk hetan oportunidade.
Atividade ne’e sei akompaña husi Prezidente Konsellu Imprensa, Cezar Mali ne’ebé sai hanesan xefe delegasaun no tuir informasaun benefisiáriu sira-ne’e sei arranka iha loron aban 14 fulan-Janeiru no sei fila fali iha loron 17 fulan-Janeiru 2026.
Jornalista : Alexandra da Costa
Editór : Cancio Ximenes
