DILI, 13 Janeiru 2026 (TATOLI) – Embaixadór Japaun iha Timor-Leste, Yasushi Yamamoto, hala’o vizita kortejia bá edifísiu Bee Timor-Leste (BTL) hodi haree progresu serbisu sira liga ba bee no saneamentu, ne’ebé durante ne’e Governu japonés ajuda Timor-Leste, liuhusi Ajénsia Kooperasaun Internasionál Japaun (JICA, sigla portugés).
Prezidente Konsellu Ezekutivu Bee Timor-Leste, Empreza Públika (BTL, E.P), Gustavo da Cruz, esplika objetivu husi vizita embaixadór nipóniku ne’e hodi diskute kona-ba preparativu atu simu vizita membru Parlamentu Japaun, ne’ebé sei mai Timor-Leste, entre loron 15 no 17 Janeiru 2026, no durante nia estadia sei vizita mós Estasaun Tratamentu Bee iha Sentral Bairru Pité.
Tuir nia, membru Parlamentu ne’ebé sei mai ne’e hamutuk na’in-lima ne’ebé mai husi Partidu Demokrátiku Liberál, Partidu Sosiál Dekokrátiku, no Partidu Demokrátiku.
“Nune’e, ohin embaixador hakarak halo vizita uluk hodi haree kondisaun no preparativu sira, molok membru Parlamentu Japaun mai”, Gustavo da Cruz hateten iha edifísiu Kaikoli, Dili, ohin.
Tuir nia, vizita atesipada ida-ne’e embaixadór halo tanba ida-ne’e hanesan sistema administrativu ka polítika husi nasaun ne’ebé de’it depoizde sira apoia país ida, bainhira nia membru Parlamentu ka ezekutivu sira mai atu halo auditoria ka fiskalizasaun ba tulun sira ne’ebé fó ona.
Tanba Timor-Leste mós hola parte hetan apoiu husi Japaun maka iha tinan ne’e deputadu sira mai hodi haree progresu serbisu sira ne’ebé durante ne’e halo, tanba osan ne’ebé Japaun fó apoiu ne’e aprova liuhusi Parlamentu.
Nia esplika katak Japaun nia tulun ba Timor-Leste la’ós foin, maibé dezde Timor-Leste restaura nia independénsia. Susesu sira husi serbisu ne’ebé Japaun koopera ho BTL mak hanesan halo konstrusaun ba Estasaun Tratamentu Bee Sentrál iha Bairru Pité, Mutudare, Benamauk, no halo melloramentu ba sistema bee-moos iha Ainaru, Likisá, Dili-Manleuana no seluk tan.
Aleinde halo vizita kortejia, Embaixadór Japaun ho ekipa bá haree mós Estasaun Tratamentu Bee Sentrál (WTP) iha Bairru Pité.
Embaixadór Japaun iha Timor-Leste, Yasushi Yamamato, hateten nia parte vizita bá estasaun bee ne’e atu haree progresu serbisu iha tratamentu bee-moos nian.
“Projetu ida-ne’e susesu tebes. Nune’e, ami mai iha ne’e no fó hela konsellu ba projetu ida-ne’e, no ami sei kontinua fó apoiu ba setór bee-moos ba povu Timor-Leste, no ami hein atu kontinua ami-nia kooperasaun sira ne’e ba oin”, dehan.
Nia salienta katak Japaun nia apoiu ba Timor-Leste durante ne’e la’ós de’it iha área bee-moos, maibé iha setór saúde no infraestrutura sira. “Ami nafatin apoia saida de’it maka Timor-Leste presiza, liuliu ba setór bee. Ami sei nafatin ajuda Timor-Leste tanba ida-ne’e hanesan buat ida ne’ebé importante liu ba saúde povu Timor-Leste nian. Fornesimentu bee ne’ebé seguru, moos, no sustentavel mak buat ida ne’ebé importante liu ba ema nia moris”, konklui.
Jornalista: Arminda Fonseca
Editora: Maria Auxiliadora
