KOVALIMA, 13 Janeiru 2026, ( TATOLI) – Programa Nasionál Dezenvolvimentu Suku (PNDS) Kovalima sei konstrui dapur merenda eskolár 20.
“Kada tinan, ita sempre konstrui uma ba programa merenda eskolár bazeia prioridade ne’ebé maka proposta mai husi Servisu Munisipál Edukasaun Kovalima, nune’e iha tinan 2026 ita uza orsamentu adisionál hodi konstrui uma ba programa merenda eskolár 20 iha Munisípiu Kovalima”, Diretór PNDS apoiu Servisu Munisipál Kovalima, Pedro de Araújo Gomes,informa ba TATOLI iha Kovalima.
PNDS implementa projetu konstrusaun uma merenda Eskolár hamutuk 20 bazeia ba proposta husi Servisu Munisipál Edukasaun Kovalima.
Maske, nia dehan proposta husi edukasaun Kovalima hamutuk 70, maibé PNDS konsidera 20 no projetu balun WFP maka sei implementa.
“Prosesu atu implementa projetu konstrui uma merenda eskolár semana oin hahú ona halo survei molok atu konstrui uma ba merenda eskolár. Orsamentu ne’ebé maka atu konstrui uma merenda eskola mai husi Ministériu hamutuk rihun $450 la inklui ho programa PNDS regulár”, nia afirma
Jornalista: Celestina Teles
Editór: Florencio Miranda Ximenes
