DILI, 14 Janeiru 2026 (TATOLI)—Governu liuhusi reuniuan Konsellu Ministrus aprova Dekretu-Lei ne’ebé aprezenta husi Ministru Prezidénsia Konsellu Ministrus, Agio Pereira no Sekretáriu Estadu Komunikasaun Sosiál, Expedito Dias Ximenes, kona-ba alterasaun daruak ba Dekretu-Lei númeru 42/2008, 26 Novembru, ne’ebé transforma Rádiu no Televizaun Timor-Leste (RTTL) sai Empreza Públika.
Diploma ida-ne’e ho objetivu atu ajusta rejime jurídiku Rádiu no Televizaun Timor-Leste, Empreza Públika nian ho enkuadramentu legál foun ne’ebé estabelese husi Dekretu-Lei númeru 10/2025, 30 Abríl, relasiona ho sistema fiskalizasaun no fiskalizasaun ba entidade jurídika públika sira-ne’ebé halo parte iha Administrasaun indireta Estadu nian, hodi garante armonizasaun nesesária no koerénsia kuadru normativu ne’ebé aplikavel.
Enkuantu alterasaun ne’ebé daudaun ne’e aprova ona responde mós ba inezisténsia to’o ohin loron, husi Konsellu Fiskál ida-ne’ebé kompletu no iha funsaun iha RTTL, kondisaun ne’ebé ezije husi rejime jerál ba empreza públika.
Nune’e, haree ba difikuldade estruturál sira no limitasaun rekursu umanu espesializadu atu harii órgaun kolejiál ida ba fiskalizasaun, diploma ne’e prevee substituisaun Konsellu Fiskál ho órgaun singulár ida mak Fiskál Úniku, hodi bele garante kontinuidade no efikásia ba funsaun fiskalizasaun nian.
Aleinde haree ba faktu RTTL hanesan órgaun komunikasaun sosiál Estadu nian no ninia funsionamentu depende ba finansiamentu Orsamentu Jerál Estadu (OJE).
Normalmente revizaun ida-ne’e reforsa mekanizmu akompañamentu no kontrolu husi parte membru Governu ne’ebé responsavel ba tutela no membru Governu responsável ba área finansas, hodi promove supervizaun ida-ne’ebé rigoroza liu ba utilizasaun rekursu públiku no ezekusaun atividade empreza nian.
Jornalista : Alexandra da Costa
Editór : Cancio Ximenes
