Governu aprova rejime jurídiku ba Kontratu Traballu ho Termu Sertu iha AP
DILI, 14 Janeiru 2026 (TATOLI)—Governu liuhusi reuniua Konsellu Ministru, kuarta ne’e, aprova Dekretu-Lei kona-ba Rejime Jurídiku ba Kontratu Traballu ho Termu Sertu iha Administrasaun Públika (AP).
Proposta ne’e aprezenta husi Ministra Finansa, Santina José Rodrigues F. Viegas Cardoso no Prezidente Komisaun Funsaun Públika, Agostinho Letêncio de Deus no husi grupu traballu ba reforma jestaun rekursu umanu iha Administrasaun Públika nian.
Bazeia ba diploma ida-ne’e ho objetivu prinsipál atu estabelese rejime jurídiku ida-ne’ebé klaru, uniforme no transparente hodi selebra, jere no fiskaliza kontratu traballu ho termu sertu iha Administrasaun Públika, hodi garante utilizasaun ida-ne’ebé responsável ba rekursu umanu no finanseiru Estadu nian hodi hatán ba nesesidade temporária servisu nian.
Nune’e, entre medida prinsipál sira-ne’ebé agora aprova ona mak definisaun ba prosedimentu rekrutamentu no selesaun nian bazeia ba kritériu méritu, transparénsia no igualdade jéneru, estabelesimentu regra sira-ne’ebé klaru kona-ba durasaun kontratu no sira-nia limite renovasaun ida-idak.
Enkuantu kriasaun kategoria kontratadu no eskalaun remuneratóriu ho valór mínimu no másimu ne’ebé define ona, nomós introdusaun ba mekanizmu jestaun no avaliasaun dezempeñu ne’ebé bazeia ba planu serbisu, relatóriu períodiku no indikadór sira rezultadu nian.
Aleinde diploma ne’e mós estabelese regra espesífiku sira kona-ba impedimentu, eskluzividade, benefísiu aplikavel sira, fonte finansiamentu nian no mós responsabilidade husi servisu rekursu umanus no Ministériu Finansa.
Jornalista : Alexandra da Costa
Editór : Cancio Ximenes
