DILI, 14 Janeiru 2026 (TATOLI) – Vise-Primeiru-Ministru (VPM) Francisco Kalbuadi Lay kuarta ne’e, hasoru malu no atualiza situasaun ekonomia iha rai-laran ba Prezidente Repúblika José Ramos-Horta.
“Ha’u mak atu informa ba Prezidente Repúblika katak foin lalais Konsellu Ministru aprova no hetan ona orientasaun husi Primeiru-Ministru katak ha’u sei nafatin koordena ho ekipa Palásiu Prezidensiál hodi servisu hamutuk ba oin iha tinan 2026 liuliu kria atividade sira hanesan ita liu ona iha 2025. Iha oportunidade ne’em ha’u mós atualiza situasaun ekonómika ba ita-nia Prezidente,” Kalbuadi hateten hateten ba jornalista sira hafoin hala’o enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pite.
Nia dehan, situasaun mundiál agora la’o maibé Timor-Leste konsentra liu oinsá atu hadi’a ekonomia rai-laran no dudu dezenvolvimentu ba oin.
“Ita tenke informa duni situasaun ekonomia rai-laran ba Prezidente tanba agora daudaun situasaun mundiál ne’ebé la’o hela, maibé ita só konsentra de’it ba ita-nia uma-laran. Tuir orientasaun Primeiru-Ministru nian mai ami membru Governu hotu katak tinan 2026 hanesan tinan asaun, entaun ita konsentra atu dudu ita-nia ekonomia ba oin,” nia hateten.
Nia hatutan, tuir servisu ne’ebé iha, VPM sei koordena nafatin ho Ministériu sira-ne’ebé haree liu ba asuntu ekonomia hanesan Agrikultura, Telekomunikasaun, Peska, Floresta no seluk tan.
Governu nafatin buka meiu hotu-hotu oinsá atu atrai investór sira bele mai halo investimentu iha Timor-Leste.
“Ha’u seidauk garante investór hira mak atu mai halo investimentu iha ita-nia rain, maibé ita halo meiu hotu oinsá atu atrai investór sira. Ita-nia prioridade agora mak oinsá dudu ekonomia, no área hotu-hotu importante maibé ita konsentra liu ba investimentu,” nia dehan.
Tanba ne’e, iha 2026, Governu komprometidu atu kria Banku Dezenvolvimentu Nasionál ho objetivu atu fasilita emprezáriu lokál sira atu dudu ekonomia la’ós de’it iha nasionál maibé tun to’o emprezariu sira-ne’ebé ho baze kiik.
Jornalista : Hortencio Sanchez
Editór : Cancio Ximenes
