KM aprova lisensiamentu setoriál ba atividade komersiál
DILI, 14 Janeiru 2026 (TATOLI)—Governu liuhusi desizaun koletiva iha reuniaun Konsellu Ministru halo aprovasaun ba projetu Dekretu-Lei, ne’ebé aprezenta husi Ministru Komérsiu no Indústria, Filipus Nino Pereira, kona-ba alterasaun dahuluk ba Dekretu-Lei nú. 89/2023, 20 Dezembru, kona-ba lisensiamentu setoriál ba atividade komersiál.
Diploma ida-ne’e nia objetivu atu kurrije kontradisaun ne’ebé identifika durante prosesu regulamentasaun husi rejime ne’ebé vigora daudauk, hodi nune’e bele garante nia kompatibilidade ho rejime jerál lisensiamentu ba atividade ekonómika no ho rejime setoriál seluk, hanesan rejime ba turizmu, saúde, petrolíferu no minerál.
Nune’e, ho alterasaun ne’ebé agora aprova ona, estabelesimentu sira-ne’ebé hala’o atividade hanesan restaurante, faan bebida nomós sira-ne’ebé fa’an produtu farmaséutiku, kombustível no minerál inklui husi rejime ida-ne’e tanba atividade sira-ne’e iha nafatin sira-nia lejizlasaun rasik.
Aleinde ne’e, introdús mós aperfeisoamentu balun no rekizitu tékniku aplikavel balun ne’ebé simplifika ona ba estabelesimentu komersiál.
Iha biban ne’e mós Ministru Komérsiu no Indústria, Nino Pereira halo aprezentasaun ida ba Konsellu Ministru kona-ba partisipasaun Timor-Leste nian iha retiru sorumutu funsionáriu importante ekonomia ASEAN nian (SEOM Retreat), ne’ebé hala’o iha fulan-Dezembru liubá, inklui mós kona-ba preparasaun sorumutu funsionariu importante ekonomia ASEAN nian (SEOM 1/57), ne’ebé ajenda ona ba fulan ida-ne’e, iha Filipina.
Enkuantu, aprezentasaun enkuadra retiru SEOM hanesan momentu reflesaun estratéjiku ida kona-ba ajenda ekonómika ASEAN nian ba períodu pós-2025, inklui inísiu implementasaun Vizaun Komunidade ASEAN 2045 nian no Planu Estratéjiku Komunidade Ekonómika ASEAN nian ba tinan 2026–2030, nomós aliñamentu prioridade rejionál sira iha kontestu prezidénsia Filipina nian ba ASEAN iha 2026.
Ida-ne’e mós iha oportunidade destaka importánsia husi partisipasaun Timor-Leste nian iha prosesu ida-ne’e, nu’udar Estadu-Membru ASEAN nian ne’ebé foun liu, hodi fó énfaze ba reforsu husi envolvimentu nasionál iha mekanizmu koordenasaun ekonómika rejionál no preparasaun téknika no institusionál ne’ebé hala’o daudaun atu garante integrasaun plena iha mekanizmu sira organizasaun nian.
Jornalista : Alexandra da Costa
Editór : Cancio Ximenes
