DILI, 14 Janeiru 2026 (TATOLI)–Ministru Interiór, Francisco da Costa Guterres, prefere atu haree uluk promosaun diviza ba Ofisiál Superiór Polísia Nasionál Timor-Leste (PNTL) hafoin mak foin diskute Komandante Jerál PNTL foun.
“Ami sei hein tan semana ida. promosaun sira ne’e la’o tiha lai mak ita haree mak foin tama ba ida-ne’e,” Ministru Francisco hateten ba Jornalista sira hafoin partisipa iha reuniaun Konsellu Ministru, iha Palásiu Governu, Kuarta ne’e.
Notísia relevante : Governu sei halo promosaun diviza ba Ofisiál Superiór na’in-40 resin PNTL
Promosaun ba Ofisiál Superiór kuaze hahú, ne’ebé daudaun hein desizaun Konsellu Ministru.
“Semana oin, ami espera katak ami aprezenta ba Konsellu Ministru para hetan aprovasaun para ita avansa ona,” nia akresenta.
Maski nune’e, Governante ne’e la fiksa númeru ofisiál Superiór ne’ebé sei hetan promosaun.
“Ha’u la fiksa, maibé ba ida-ne’e ami haree tiha lai estrutura. Ba ida-ne’e ha’u seidauk bele adianta buat ruma tanba hein Konsellu Ministru aprova tiha mak ha’u sei fó hateten fali ba imi vaga ne’e hira. Ha’u agora adianta ona depois mai iha ne’e mak Konsellu Ministru la konkorda vaga ida-ne’e, entaun ha’u bosokten, entaun di’ak liu hanesan ne’e, hein Konsellu Ministru aprova lai,” nia katak.
Ministru Interiór mós sei aprezenta kona-ba mekanizmu ba promosaun iha reuniaun ezekutivu.
Jornalista : Natalino Costa
Editora : Julia Chatarina
