DILI, 15 Janeiru 2026 (TATOLI) – Ró Bibiloteka Flutuante internasionál Doulos Hope to’o ohin iha Portu Dili pur volta tuku 10h40 otl. Objetivu husi ró ne’e mai atu loke feira livru ba públiku, entre loron 16 no 28 Janeiru 2026.
Diretór Nasionál Marketing Turizmu no Relasaun Internasionál, Edson Lopes, hateten vizita Doulos Hope mai Timor-Leste tanba serbisu hamutuk ho Ministériu Turizmu no Ambiente no ministériu sira seluk, liuliu halo promosaun ba sítiu turístiku sira.
“Aban atividade feira livru ne’e loke ofisialmente ba públiku no feira ne’e rasik sei hala’o iha ró laran, iha Portu Dili”, dehan.
Feira livru ne’e sei partisipa husi Prezidente Repúblika, José Ramos-Horta, membru Governu balun inklui Embaixadór sira.
Maski ró ne’e atraka ona iha Portu Dili, maibé pasajeiru sira seidauk bele tun, tanba hein ekipa husi Diresaun Nasionál Transporte Marítima, imigrasaun, kuarentena no saúde, halo uluk inspesaun.
“Vantajen husi vizita ró ne’e sei promove Timor-Leste ba mundu, tanba sira mai ne’e voluntáriu husi nasaun 35 ho totál ema hamutuk 100. Sira sei promove Timor-Leste nu’udar nasaun ne’ebé promove pás la’ós konflitu”, afirma.
Voluntáriu husi Doulos Hope, husi Filipina, Mae Gabrillo, husu ba públiku atu vizita feira livru ne’e rasik. “Aban ami sei loke ba públiku, ema ho tinan 18 mai kraik vizita la selu no tinan 19 ba leten vizita sei seluk ho folin $0,20. Iha biblioteka, ami iha livru hamutuk rihun 2 ne’ebé ho tipu diferente”, dehan.
Shekinah de Sousa, voluntáriu seluk husi Doulos Hope husi Áfrika Súl, hateten iha feira ne’e sei la limite ba públiku, tanba kada loron iha oras ida simu ema 300.
Tuir nia, hafoin abertura feira iha aban, sei loke ba públiku ba hahú tuku 13h00 to’o 17h00, maibé iha bainrua loke hahú tuku 10h00 no taka iha tuku 17h00. Ró ne’e sei fila iha loron 29 Janeiru 2026.
“Ami mós halo ona karta ba Ministériu Edukasaun oinsá atu konvida estudante sira husi eskola sira iha Dili bele mai vizita feira livru ida-ne’e”, dehan.
Jornalista: Arminda Fonseca
Editora: Maria Auxiliadora
