DILI, 15 Janeiru 2026 (TATOLI)–Vise-Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, akompañadu husi Vise-Ministru Asuntu Parlamentár Adérito Hugo da Costa, kinta ne’e, hasoru malu ho delegasaun Parlamentár husi Japaun hodi ko’alia kona-ba hametin kooperasaun entre Timor-Leste no Japaun iha área infrastrutura, agrikultura no Turizmu.
“Ami simu bainaka mai husi Japaun, Deputadu na’in-tolu (3) Deputada na’in-ida (1), sira hamutuk na’in-haat (4) akompaiñ husi Embaixadór Japaun nian iha ne’e, sira mai ami ko’alia atu reforsa tan ita-nia kooperasaun bilaterál liuliu iha área infrastrutura, agrikultura, turizmu no área oioin,” Kalbuadi hateten ba jornalista sira iha edifisiu Ministériu Turizmu Ambiente, Faról.
Kalbuadi hato’o mós agardesementu ba Japaun nia kontribuisaun ba Timor-Leste hahú kedan iha 1999, no fiar katak kooperasaun ne’e bele kontinua ba oin nafatin, la’ós de’it kooperasaun entre Governu ho Governu maibé kooperasaun entre husi povu ba povu.
Iha sorin seluk, Vise-Ministru Asuntu Parlamentár Adérito Hugo da Costa reforsa tan katak kooperasaun bilaterál entre Timor-Leste ho Japaun importante tebes no Japaun ajuda ona Timor-Leste iha área oioin hodi tulun Timor-Leste nia dezenvolvimentu.
“Japaun apoiu ita hahú kedan Pos-Referendu to’o mai ohin loron, agora daudaun iha mós indústria boot ida iha Laleia, industria Estaleiru nian, ne’ebé daudaun ne’e iha hela koordenasaun intensivu ho ministériu relevante sira hanesan Ministériu Finansa no Ministériu Justisa no agora daudaun hein hela progresu finalizasaun, ida-ne’e faze ida husi ita-nia relasaun bilaterál nian,” nia dehan.
Tanba ne’e, vizita ne’ebé membru Parlamentár Japaun hala’o mai Timor-Leste importante tebes atu hametin liutan kooperasaun no hatudu sinál di’ak ba dezenvolvimentu Timor-Leste nian.
Jornalista : Hortencio Sanchez
Editór : Cancio Ximenes
