2026, PDIM iha Baukau projetu hamutuk 29
DILI, 15 Janeiru 2026 (TATOLI)–Programa Dezenvolvimentu Integradu Munisipál (PDIM) iha Autoridade Munisipál Baukau (AMB) projetu hamutuk 29 iha tinan 2026.
Prezidente Autoridade Munisipál (PAM) Baukau, Veneranda Eurico Lemos Martins esplika projetu 29 husi PDIM referidu aprova ona husi nasionál iha-ne’ebé antes atu implementa sei halo ezersísiu liuliu iha área saúde no edukasaun.
“Tuir aprovasaun ne’ebé ita iha projetu 29 ne’ebé mak haree liubá infraestrutura nian, maibé ami halo ezersísiu internamentu tanba projetu sira husi edukasaun no saúde nian ne’e proto tipu,” Veneranda Lemos hateten iha nia kna’ar fatin, Kinta ne’e.
Eis deputada ne’e relata projetu proto tipu AMB sofre korte husi nasionál entaun presiza halo ezersísiu hanesan tenke iha dezeñu nune’e bainhira implementa bele kobre ba projetu proto tipu husi Ministériu Saúde ho Edukasaun nian.
Bainhira finaliza ezersísiu ba totál projetu 29 sei kontinua prosesa iha aprovizionamentu nune’e anúnsia ba públiku atu implementa liuhusi orsamentu PDIM iha Munisípiu Baukau.
“Projetu sira-ne’e inkluidu mós edifísiu eskola, postu saúde, uma ba profisionál saúde sira, uma ba profesór, bee-moos, jardín no iha mós estrada ne’ebé ita atu responde iha postu balun,” Veneranda tenik.
Veneranda argumenta projetu hirak-ne’e seidauk fó-sai lokál implementasaun tanba sei liuhusi prosesu aprovizionamentu maibé tuir planu sei hala’o iha territóriu Munisipál Baukau hanesan postu ualu no suku 62 ne’ebé aloka husi rúblika kapitál dezenvolvimentu tinan-2026.
Entretantu, totál orsamentu Munisípiu Baukau ba tinan-ne’e hamutuk $13.802.085 ne’ebé fahe ba kategoria kapitál dezenvolvementu hamutuk $2.310.213.
Jornalista: Natalino Belo
Editór: Xisto Freitas da Piedade
