DILI, 15 Janeiru 2026 (TATOLI)–Primeiru-Ministru (PM), Kay Rala Xanana Gusmão, hateten nia parte fó ona orientasaun ba Ministru Administrasaun Estatál (MAE) hodi alerta ba Prezidente Autoridade Munisipál hotu atu aselera Programa Merenda Eskolár (PME), atu nune’e labele tarde ba estudante sira iha tinan 2026.
“Orienta ona ba Ministru Tomas Cabrál atu hateten ba Prezidente Autoridade Munisipál hotu prepara didi’ak, buat ne’ebé agora sai hanesan urjente liu ba ezekusaun Orsamentu Jerál Estadu 2026 iha Munisípiu mak merenda eskolár,” Xanana hateten ba jornalista sira hafoin ramata enkontru ho Xefe Estadu José Ramos-Horta iha Palásiu Prezidensiál Nicolau Lobato, Bairru Pite, ohin.
Xefe Governu ne’e dehan, tenke aselera ho urjente merenda eskolár atu nune’e labele halo tarde no fó impaktu ba estudante sira.
“Buat ne’ebé urjente mak merenda eskolár, ida-ne’e tenke aselera, sé lae neineik ba neineik to’o ona fulan-Abríl mak foin hahú, fulan tolu Janeiru-Marsu labarik sira la han, depois osan sira-ne’e tau hela iha ne’ebá, ida-ne’e labele,” Xanana dehan.
Nia hatutan, esperiénsia iha tinan sira ba kotuk halo ezekusaun ba orsamentu ne’ebé preve ba merenda eskolár tarde ikus osan sira tau metin de’it iha banku no labarik sira mak sai vítima.
“Se lae, to’o tinan ikus osan sira-ne’e barak hela la gasta, entaun tenke fila hotu ba kofre Estadu, maibé labarik sira iha eskola ne’ebá presiza atu hetan merenda eskolár,” nia hateten.
Objetivu husi merenda eskolár
Programa Merenda Eskolár ne’e koordena malu entre Ministériu Administrasaun Estatál (MAE), hamutuk ho Ministériu Edukasaun (ME) no Ministériu Saúde (MS), nune’e iha 24 Abríl 2025, promove asaun divulgasaun nasionál ida kona-ba regra foun Programa Merenda Eskolár (PME), ne’ebé dirije ba ninia implementadór prinsipál sira, iha eventu ida-ne’ebé hala’o iha City-8, iha Dili.
Objetivu prinsipál husi inisiativa ida-ne’e atu garante aliñamentu tékniku no administrativu entre entidade hotu-hotu ne’ebé envolve iha operasionalizasaun programa, tuir enkuadramentu legál foun ne’ebé estabelese ona husi Dekretu-Lei nú. 61/2022 no Dekretu Governu nú. 3/2025.
Hodi rekoñese importánsia husi alimentasaun adekuada ba kreximentu saudavel, aprendizajen efetivu no hamenus dezigualdade sira, Governu lansa Programa Merenda Eskolár hanesan inisiativa estratéjiku ida atu garante asesu universál no ekuitativu ba hahán nutritivu sira iha estabelesimentu edukasaun pré-eskolár no ensinu báziku iha territóriu nasionál tomak.
Programa ne’e atribui subsídiu ida iha ámbitu asaun sosiál eskolár nian, ho objetivu atu garante direitu ba refeisaun diária, saudavel no ekilibrada, ne’ebé importante tebe-tebes ba dezenvolvimentu labarik nian.
Aleinde atu kombate inseguransa ai-han no hadi’a dezempeñu eskolár, Programa Merenda Eskolár ne’e mós ho objetivu atu promove dezenvolvimentu sustentável ba komunidade liuhusi promove produsaun no konsumu ai-han ne’ebé mai-husi agrikultura lokál.
Nune’e, ninia implementasaun hanesan kompromisu ida-ne’ebé firme husi Estadu ba moris di’ak no futuru labarik timoroan sira-nian, nune’e mós kontribui ba halakon hamlaha, reforsa ekonomia lokál no dezenvolvimentu kapitál umanu nasionál.
Dekretu Governu nú. 3/2025 define prosedimentu no padraun sira atu implementa PME ne’e ho efikás no sustentável, klarifika responsabilidade sira husi parte oioin, nomós mekanizmu monitorizasaun no avaliasaun ne’ebé nesesáriu atu asegura transparénsia no kualidade iha ezekusaun ba programa.
Jornalista : Hortencio Sanchez
Editór : Cancio Ximenes
