OEKUSI, 16 Janeiru 2026 (TATOLI) – Evita asidente tráfegu, Diresaun Transporte Terrestre no Komunikasaun (DRTT) Rejiaun Administrativa Espesiál Oekusi Ambeno (RAEOA), sesta ne’e, halo ona reabilitasaun ba sinál tranzitu sira, hahú husi fronteira Sakato to’o Ponte Noefefan no kontinua to’o terminál Tono perténsia ba sub-rejiaun Pante Makasar.
Xefe Departamentu DRTK Oekusi, Domingos de Almeida, informa, reabilitasaun sinál tránzitu hirak-ne’e ho objetivu atu fasilita transporte públiku sira hodi evita asidente tráfegu.
Notísia relevante:Tinan ne’e, DRTT Oekusi arrekada reseita rihun $147-resin ba kofre Estadu
“Ita haree sinál tránzitu sira barak mak la funsiona, tan ne’e obrigasaun no responsabilidade Diresaun Transporte nian tenke hadi’a no troka, atu fó hanoin ba públiku liu-liu motorista sira tantu motorizada, karreta no tum-tum, atu hatene tuir lala’ok sinál sira-ne’ebé ita monta, nune’e bele evita asidente,” nia hateten ba jornalista sira iha Oekusi, ohin.
Hironimos Quebo, agradese ba ekipa DRTT Oekusi, tanba ho reabilitasaun sinál tránzitu hirak-ne’e, bele fasilita transporte sira-nia movimentasaun iha dalan públiku sira.
“Agradese ba DNTT tanba monta sinál tránzitu ne’e importante atu evita dezastre, tanba durante ami hanesan motorista dalaruma la tuir sinál tranzitu sira tanba barak mak aat liu-liu iha rotunda sira no barak mak laiha,” nia orgullu.
Notísia relevante:APC rejista tipu kazu dezastre naturál oinoin iha territóriu nasionál
Entretantu, fornesimentu ba materiál sinál tránzitu hirak-ne’e, mai husi empreza João Bosco Unipesoál Lda ho valór kontratu rihun $40-resin, verba ne’e Autoridade RAEOA aloka hosi Orsamentu Jerál Estadu (OJE) 2025 nian.
Jornalista: Abílio Elo Nini
Editór: Rafael Ximenes de A. Belo
