DILI, 16 Janeiru 2026 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas, hala’o enkontru kortejia ho Sekretária Ezekutiva Komunidade Nasaun Sira Ko’alia Lian Portugés (CPLP-sigla portugés), Embaixadora Maria de Fátima Jardim, iha Lisboa, Portugal hodi aborda ptograma kooperasaun no Prezidénsia Rotativa 2026-2027.
Notísia Relevante: Ministru Bendito dezloka ba Portugál halo koordenasaun kona-ba TL sai Prezidénsia rotativa CPLP
Iha enkontru ne’e, Ministru Negósiu Estranjeiru no Kooperasaun (MNEK), Bendito dos Santos Freitas, ho Sekretária Ezekutiva CPLP, Embaixadora Maria de Fátima Jardim ko’alia kona-ba prezidénsia protempore CPLP ne’ebé sei assume periodu 2026-2027 no mós aborda sobre situasaun polítika ne’ebé akontese iha Giné-Bissau.
Ministru Bendito konsidera, vizita ne’e importante tebes atu diskute programa kooperasaun sira-ne’ebé la’o daudaun, prinsipalmente kona-ba prezidénsia rotativa CPLP ho Sekretária Ezekutiva no mós reprezentante misaun permanente husi nasaun membru CPLP sira, hafoin dezisténsia Giné-Bissau nian husi kargu ida-ne’e.
“Tanba ne’e mak ami mai iha ne’e, ho onra no orgullu boot, hodi vizita komunidade nasaun luzófona nia uma. Ami mós fahe ami-nia vizaun sira ba futuru ida-ne’ebé di’ak-liu ba komunidade ida-ne’e,” Ministru Bendito hateten liuhusi nota ne’ebé TATOLI asesu, ohin.
Iha loron 16 fulan-dezembru 2025, liuhusi primeiru konferénsia estraordinária Xefe Estadu no Xefe Governu nian, deside ona katak Timor-Leste sei asume prezidénsia pro tempore CPLP nian. Ida-ne’e hanesan pasu ida-ne’ebé Timor-Leste mós foti iha fulan-Outubru liubá bainhira sai membru plenu ASEAN nian, ho atividade barak.
Konsidera katak, situasaun ida-ne’e úniku no esepsionál tebes, tan ne’e, Timor-Leste prontu atu servisu hamutuk ho Sekretariadu CPLP nu’udar Estadu-membru hodi asegura atividade hotu organizasaun nian hodi fó benefísiu ba povu no ba komunidade tomak.
Perante reprezentante misaun permanente husi estadu-membru CPLP nian, Ministru Negósiu Estranjeiru no Kooperasaun, Bendito Freitas depozita formalmente estatutu revizaun versaun Luanda nian ne’ebé ratikadu hosi Parlamentu Nasionál Timor-Leste nian ba Sekretária Ezekutiva CPLP, Embaixadora Maria de Fátima Jardim.
Entretantu, vizita ba Sekretariadu CPLP ne’e, Ministru Bendito Freitas akompañaDU husi Reprezentante Misaun Permanente Timor-Leste Juntu CPLP, Embaixadora Laura Abrantes, Diretora Nasional ba CPLP, Joaquim Fernandes, Konselleiru Aviano Faria no seluk tan.
TATOLI
