DILI, 16 Janeiru 2026 (TATOLI)-Ministru Obras Públikas, Samuel Marçal, klarifika katak informasaun ne’ebé espalla iha públiku katak sei iha posibilidade Governu kansela atividade lansamentu ba reabilitasaun estrada urbana iha Ermera ne’e “la loos”.
Notísia Relevante:
“Ne’e fixu ona tanba ekipa preparadu ona ba koordena ho parte autoridade munisipál nian hodi haree fatin ba realizasaun atividade, nune’e buat hotu loos ona,” Ministru Samue; hateten ba Agência Tatoli liuhusi telefónika, ohin.
Nia hatutan, iha 15 Janeiru ne’e, ekipa husi Ministériu Obra Públika hasoru nalu ona ho Prezidente Autoridade Munisípiu Ermera, hodi halo Liña kordenasaun kona-ba preparasaun atividade lansamentu fatuk dahuluk ba projetu reabilitasaun estrada Ermera ne’ebé sei hala’o iha 26-27 Janeiru 2026.
Prezidente Autoridade Munisípiu Ermera, José Martinho dos Santos Soares, hateten loos duni ekipa sira husi Ministériu Obra Públika ida mai atu koordena ho autoridade lokál hodi haree hamutuk fatin atu realiza atividade lansamentu nian entre iha Letefoho ho Ermera, nune’e nia delega kedas ekipa planeamentu estratéjiku no invetimentu munisipál tun ba terrenu haree kondisaun, entaun sira identifika ona fatin ba serimónia mak iha suku Eraulu.
“Ami sente orgullu no hato’o agradesementu ba Estadu tau matan ba povu Ermera tanba dezenvolvimentu ne’e ami hein kle’ur, satán situasaun kondisaun estrada Ermera ladun di’ak,” nia hateten.
Nia hatutan, daudaun ne’e mós empreza hahú normaliza ona dalan sira-ne’ebé mak kondisaun aat grave, nune’e prosesu tuir mai sira kontinua kedas ho atividade implementasaun obra ida-ne’e.
“Kona-ba loron atu halo lansamentu ne’e fixu ona iha loron 26-27 fulan-janeiru ne’e no sei lansa direta husi Primeiru-Ministru, Kay Rala Xanana Gusmão,” nia dehan.
Jornalista : Akexandra da Costa
Editór : Cancio Ximenes
